न्यायाधीश भुवन गिरीकी श्रीमतीले सर्वोच्च परिसरमै गरिन् आत्मदाहको प्रयास

२९ पुस, काठमाडौं । सर्वोच्च अदालत अगाडि एक महिलाले आत्मदाहको प्रयास गरेकी छिन । आइतबार दिउँसो न्यायाधीश भुवन गिरीकी श्रीमतीले सर्वोच्च अदालत परिसरमा आत्मदाहको प्रयास गरेकी हुन ।

प्रहरीका अनुसार सर्वोच्च अदालत पुगेकी ती महिलाले आफूमाथि मट्टितेल छर्किएकी हुन ।

प्रहरीले उनलाई तत्काल उद्धार गरी वीर अस्पताल लगेको जिल्ला प्रहरी परिसर काठमाडौंका प्रवक्ता प्रहरी उपरीक्षक कुमोध ढुंगेलले बताए ।

ती महिलाले श्रीमान गिरीमाथि वैवाहिक बलात्कारको मुद्दा हालेकी थिइन । उनले गिरीलाई थुनामा राख्न माग गर्दै आएकी छिन । 

गिरीविरुद्ध जिल्ला अदालत कपिलवस्तुले चैत २२ गते पक्राउ पुर्जी जारी गरेको थियो । जिल्ला प्रहरी परिसर काठमाडौंले गत चैत २८ गते पक्राउ गरी कपिलवस्तु लगेको थियो ।

गिरीलाई अदालतले २ लाख ७५ हजार रूपैयाँ धरौटीमा मुक्त गरेको थियो ।