प्रधानमन्त्री प्रचण्डको सचिवालयका १३ जना पदमुक्त

२ माघ, काठमाडौं । प्रधानमन्त्री पुष्पकमल दाहाल प्रचण्डले आफ्नो सचिवालयबाट १३ जनालाई हटाएका छन् । उनीहरुलाई यहि माघ १ गतेबाट हटाइएको बताइएको छ । उनीहरुले प्रधानमन्त्रीसँग एक वर्ष सचिवालयमा बसेर काम गर्न पाए । 

प्रधानमन्त्रीको सचिवालयले दिएको जानकारी अनुसार एक स्वकीय सहसचिव, ४ जना स्वकीय उपसचिव, एक स्वकीय शाखा अधिकृत, २ जना प्रशासन सहायक, २ जना कम्प्युटर सहायक र २ जना हलुका सवारी चालकलाई जिम्मेवारीबाट मुक्त गरिएको छ । 

स्वकीय सहसचिव रहेका नारायणप्रसाद ढुंगाना, स्वकीय उपसचिवहरु रमेशप्रसाद गुरागाईं, ओमकुमारी पौडेल, सावित्रीकुमारी अधिकारी र कलबहादुर नाथ विदा भएका छन् । स्वकीय शाखा अधिकृत लाले कुमालसँगै प्रशासन सहायकद्वय युवराज शाह र रामलाल पराजुली पनि हटाइएका छन् ।

कम्प्युटर सहायक बासुदेव शर्मा र खड्क योगीसँगै कार्यालय सहयोगी अविनाश वाइवा पनि प्रधानमन्त्रीको सचिवालयबाट बिदा भएका छन् । हलुका सवारी चालकहरु रमेशप्रसाद घिमिरे पवित्रबहादुर शाही पनि सचिवालयबाट हटाइएका छन् ।