विपद जोखिम न्युनीकरण तथा व्यवस्थापन प्राधिकरणलाई प्रधानमन्त्री मातहतमा ल्याउन विज्ञको सुझाव

३ माघ, काठमाडौं । जाजरकोट भूकम्पको क्षति अनुगमन गरेर फर्किएको विज्ञ टोलीले प्रधानमन्त्री पुष्पकमल दाहाल प्रचण्डलाई भेटेर क्षतिग्रस्त संरचनाको पुनर्निर्माणका लागि सुझावसहितको प्रतिवेदन बुझाएको छ । टोलीले पुनर्निर्माणका कार्यका लागि राष्ट्रिय विपद जोखिम न्युनीकरण तथा व्यवस्थापन प्राधिकरणलाई पुनर्निर्माण प्राधिकरण जस्तै गरी प्रधानमन्त्री कार्यालय मातहत ल्याउन राय दिइएको छ ।

गत कात्तिक १७ गते जाजरकोट केन्द्रबिन्दु भएर गएको भूकम्पबाट १५७ जनाको मृत्यु भएको थियो । ६५ हजार घर कुनै न कुनै रुपमा क्षति भएको टोलीले प्रतिवेदनमा उल्लेख गरेको छ । भूकम्पले भत्किएका संरचनाको पुनर्निर्माणका लागि सुझाव प्रतिवेदन विज्ञको टोलीले प्रधानमन्त्री पुष्पकमल दाहाल प्रचण्डलाई भेटेर सुझाव प्रतिवेदन हस्तान्तरण गरेको हो । 

माओवादी केन्द्रका नेता जनार्दन शर्माको संयोजनमा योजना आयोगका पूर्वउपाध्यक्ष डा. गोविन्द पोखरेल, पुनर्निर्माण प्राधिकरणका तत्कालीन सीईओ सुशील ज्ञवाली, पुल्चोक इन्जिनिरिङ क्याम्पसका सहप्राध्यापक हरेराम पराजुली लगायतले सुझाव प्रतिवेदन तयार गरेका थिए । 

राज्यका निकाय र विषय विज्ञसँगको अन्तक्रिया गरेर प्रतिवेदन तयार गरिएको थियो । भूकम्पले क्षतिग्रस्त बनेका घरको निर्माण ‘आफ्नो घर आफैं बनाऔं’ मोडल मार्फत गर्न सुझाव दिइएको छ । घर दैलोमा प्राविधिक सहयोग गर्ने र प्राविधिक परीक्षणका आधारमा तीन किस्तामा आवास निर्माणको अनुदान उपलब्ध गराउन सरकारलाई सुझाव दिइएको छ ।