बुधबार बैंकिङ प्रणालीबाट २४ अर्ब २० करोड तरलता खिचेको राष्ट्र बैंकले बिहीबार २० अर्ब खिच्दै

३ पुस, काठमाडौं । नेपाल राष्ट्र बैंकले बैंकिङ प्रणालीबाट निक्षेप खिच्ने क्रमलाई निरन्तरता दिएको छ । बुधबार २४ अर्ब २० करोड रुपैयाँ तरलता खिचेको बैंकले बिहीबार पुनः २० अर्ब तरलता खिच्ने भएको छ । बुधबार ३० अर्बको निक्षेप संकलन उपकरण बोलकबोलमा राखेको थियो । ३७ अर्ब ७० करोडको आवेदन परेकोेमा २४ अर्ब २० करोड रुपैयाँ मात्रै तरलता खिचेको हो । 

निक्षेप संकलन उपकरण बोलकबोल मार्फत १४ दिन अवधिका लागि २० अर्ब रुपैयाँ तरलता खिच्न लागिएको राष्ट्र बैंक मौद्रिक व्यवस्थापन विभागले जनाएको छ । बुधबार ३० अर्बको निक्षेप संकलन उपकरणका लागि बोलकबोल आह्वान भएको ३७ अर्ब ७० करोडको आवेदन परेको हो । 

राष्ट्र बैंकले कटअफ ब्याजदर ३.०९८८ प्रतिशत ब्याजदर कायम गर्दै २४ अर्ब २० करोड रुपैयाँ मात्रै तरलता खिचेको हो । बुधबारको निक्षेप संलकन उपकरणमा बैंकहरुले अधिकतम ३.२९९९ प्रतिशत र न्यूनतम २.८९४४ प्रतिशत ब्याजदर प्रस्ताव गरेको थिए ।

बुधबार बोलकबोलमा ल्याएअनुसारको तरलता नखिचेपनि ४ माघमा पुनः ९ अर्ब ७० करोड रुपैयाँको निक्षेप संकलन उपकरण परिपक्क हुँदै छ । बुधबार पनि २५ अर्बको निक्षेप संकलन उपकरण परिपक्क भएकोले राष्ट्र बैंकले बिहीबार पुनः तरलता खिच्ने निक्षेप संकलन उपकरण बोलकबोल गर्न लागेको हो ।