सूर्तीजन्य पदार्थ बोके नेपालगञ्ज उपमहानगरपालिका कार्यालयमा प्रवेश गर्न नपाइने

९ माघ, नेपालगञ्ज । सूर्तीजन्य पदार्थ बोकेर नेपालगञ्ज प्रवेश गर्न खोज्नलाई प्रवेशमा रोक लगाउने भएको छ । नेपालगञ्ज उपमहानगरपालिकाले सूर्तीजन्य पदार्थको नियन्त्रण तथा नियमनका लागि सुरुवाती चरणमा कार्यालयभित्र प्रवेश गर्नेलाई कडाइ गर्ने भएको हो ।

नेपालगञ्ज उपमहानगरपालिकाको कार्यालयमा आउने सेवाग्राहीलाई प्रवेशद्वारमा नगर प्रहरीले जाँच गर्ने र मुखमा सूर्तीजन्य पदार्थ खाइरहेको छ भने नजिक राखेको डष्टविनमा थुक्न लगाएर मुख कुल्ला गरेर भित्र पठाउने र गोजीमा राखेको छ भने फाल्न लगाउने रणनीति बनाइएको छ ।

कसैले सूर्तीजन्य पदार्थ बोकेर भित्र प्रवेश गरेमा सुरुमा चेतावनी दिइने र फेरि पनि फेला परेमा एक सय रूपैयाँ जरिवाना गर्ने उपमहानगरले जनाएको छ ।

नेपालगञ्जका मेयर प्रशान्त विष्टले सूर्तीजन्य पदार्थ रोकथामका लागि सुरुमा उपमहानगरपालिका कार्यालयभित्र आउनेलाई कडाइ गर्न थालेको बताए । मेयर विष्टले चैत्रसम्म सूर्तीजन्य पदार्थ नियन्त्रण र नियमनका लागि सचेतना मूलक कार्यक्रमहरू गर्ने र वैशाख १ गतेदेखि कारबाहीको चरणमा जाने बताए ।