क्रिप्टो करेन्सी कारोबारी शुभम यादव र रोहन चौधरीविरुद्ध ४२ करोड बिगो दाबीसहित मुद्दा दायर

११ माघ, काठमाडौं । राजस्व अनुसन्धान विभागले क्रिप्टो करेन्सीको कारोबार गरेको अभियोगमा दुई जनाविरुद्ध मुद्दा दायर गरेको छ । 

विभागले अभौतिक मुद्रा (क्रिप्टो करेन्सी यूएसडीटी कोइन) को कारोबार गरेको अभियोगमा झापाका शुभम कुमार यादव र रोहन चौधरीविरुद्ध १४ करोड बिगोको तीन गुणा ४२ करोड सम्मको माग दाबी गरेर ललितपुर जिल्ला अदालतमा मुद्दा दायर गरेको हो ।

प्रतिवादीहरू शुभम कुमार यादव र रोहन चौधरीविरूद्ध मुद्दा दायर भएको हो । करिब ५ महिनाको सूक्ष्म अनुसन्धानपश्चात् उनीहरूविरूद्ध मुद्दा दर्ता भएको विभागले जनाएको छ । प्रतिवादी शुभम कुमार यादवले बाइनान्स एप र को पिटुपी च्यानलको प्रयोग गरी अभौतिक मुद्राको कारोबार गरेको अनुसन्धानबाट खुलेको छ । 

शुभम कुमार यादवले कारोबारको रकम राख्न तथा झिक्ने प्रयोजनका लागि उनकै साथी रोहन चौधरीको खाता प्रयोग गर्ने गरेको अनुसन्धानबाट खुलेको छ । उनीहरूलाई विदेशी विनिमय नियमित गर्ने ऐन, २०१९ को दफा १७ बमोजिमको सजाय मागदाबी गरी अभियोग दायर गरेको अनुसन्धान अधिकारी एवम् सूचना अधिकारी नवराज अधिकारीले बताए । उनले १४ करोड बिगो मागदाबी गरिएको बताए ।

राजस्व अनुसन्धान विभागका महानिर्देशक नवराज ढुंगानाले अभौतिक मुद्राको कारोबारलाई सूक्ष्म रूपमा अनुसन्धान गरिरहेको जनाएका छन् । उनीहरूमाथि विदेशी विनिमय नियमित गर्ने ऐन, २०१९ को दफा १७ बमोजिमको सजाय माग दाबी गरी अभियोग दायर गरिएको महानिर्देशक ढुंगानाले बताए ।