पौडेलको घरमा अख्तियारको टोली नपुग्दै राष्ट्रिय सभाकी उपाध्यक्ष अर्याल किन पुगिन ?

१२ माघ, काठमाडौं । अख्तियार दुरुपयोग अनुसन्धान आयोगले सुरक्षित मुद्रण केन्द्रमा भ्रष्टाचार भएको आरोपमा मुद्दा खेपिरहेका केन्द्रका पूर्वकार्यकारी निर्देशक विकल पौडेलको घरमा छापा मार्दा राष्ट्रिय सभाकी उपाध्यक्ष उर्मिला अर्याल त्यहाँ भेटिएकी थिइन । अख्तियार उच्च स्रोतले दिएको जानकारी अनुसार पौडेलको घरमा अख्तियारको टोली पुग्दा उनी त्यही भेटिएकी हुन । ‘उहाँ झण्डावाल गाडीमै त्यहाँ पुग्नु भएको रहेछ, अख्तियारको टोलीलाई उहाँले कुनै अवरोध गर्नुभएन तर हाम्रो टोली जुन कोठामा पुग्यो उहाँ पनि त्यही कोठामा हेर्न पुग्नु भयो’, उच्च स्रोतले भन्यो ।

बुधबार अख्तियारको टोली मण्डिखाटारस्थित पौडेलको घरमा छापा मार्न पुगेको थियो । स्रोतका अनुसार अर्याल र पौडेल नातेदार हुन् । अर्याल त्यहाँ देखेपछि उनको भूमिका शंकास्पद रहेको आयोगले जनाएको छ । पौडेलले आफू राजनीतिक पहुँच भएको व्यक्ति बताउँदै अख्तियारलाई छल्दै आएका थिए । विकल पौडेल र सुनील पौडेललाई अदालतल अनुसन्धानको लागि सात दिनको समय दिएको छ । नेपाल टेलिकमका तत्कालीन कार्यकारी निर्देशक सुनील पौडेल र  संरक्षण मुद्रण केन्द्रका तत्कालीन कार्यकारी निर्देशक विकल पौडेललाई अख्तियार दुरुपयोग अनुसन्धान आयोगले बुधबार दिउँसो नियन्त्रणमा लिएको थियो ।

दुवै जना भ्रष्टाचार मुद्दामा मुछिएका व्यक्ति हुन् । मुद्दा दायरपछि पनि सार्वजनिक सम्पत्ति हिनामिना गरेको कार्यकयको स्रोत साधन दुरुपयोग गरेको र सम्पत्ति विदेश पठाउने काममा संलग्न रहेको आशंकामा उनीहरू थप छानबिनमा तानिएका थिए । त्यही क्रममा बुधबार अख्तियारको टोलीले दुवैलाई पक्राउ गरी अख्तियारको हिरासत राखिएको छ । शान्तिनगर र मण्डिखाटारस्थित दुवैका निवासमा अख्तियार टोलीले छापा मारी कागजात नियन्त्रणमा लिएको थियो ।

२०८० असोज १५ मा अख्तियारले सुनील पौडेलसहितका व्यक्ति विरुद्ध २३ करोड २७ लाख ५८ हजार रुपैयाँ बिगो माग दाबी गर्दै विशेष अदालतमा भ्रष्टचार मुद्दा दायर गरेको थियो । राष्ट्रिय सूचना प्रविधि केन्द्रका तत्कालीन अध्यक्ष सञ्जय शर्मा, तत्कालीन कार्यकारी निर्देशक प्रणिता उपाध्याय, केन्द्रका उप–निर्देशक सफल श्रेष्ठ, तत्कालीन सहायक निर्देशक रमेश पोखरेल र तत्कालीन लेखा अधिकृतहरु निमबहादुर वली र रामबहादुर बुढा तथा कम्प्युटर इन्जिनियर रामशरण गायक अर्थका बजेट महाशाखा प्रमुख मधु मरासिनी (सचिव निलम्वन) विरुद्द मुद्दा दायर गरेको थियो । त्यस्तै २०८० वैशाखमा विकल पौडेलसहितका व्यक्तिविरुद्ध करिब ७० करोड रुपैंया मागदाबीसहित अख्तियारले दायर गरेको थियो ।