मासिक डेढ लाख भाडामा लाजिम्पाट सर्याे सीआईबी

१५ माघ, काठमाडौं । नेपाल प्रहरीको अपराध अनुसन्धान ब्यूरो (सीआईबी) लाजिम्पाटमा सरेको छ । मासिक डेढ लाख भाडामा नेपाल ट्रस्टको भवनमा सोमबार सीआईबीको कार्यालय सरेको हो । 

यसअघि महाराजगन्जस्थित प्रहरी एकेडेमीसँगै रहेको सानो भवनमा सीआईबीको कार्यालय थियो । न्यूनतम पूर्वाधारसमेत नभएको भन्दै सीआईबीले नयाँ कार्यालय खोजी गरेकोमा सरकारले सो भवन र जग्गा सीआईबीलाई भाडामा उपलब्ध गराएको हो । 

नेपाल ट्रस्टको कार्यालयले मासिक एक लाख ५४ हजार रुपैयाँमा सो भवन सीआईबीलाई दिएको हो । सोमबारदेखि सीआईबीले लाजिम्पाटको कार्यालयबाट काम थालेको छ । 

०६७ सालको साउनमा स्थापना भएको सीआईबीको कार्यालय सुरुमा प्रहरी प्रधान कार्यालयभित्रै थियो । त्यहाँ सर्वसाधारणलाई जान समस्या भएपछि करिब एक वर्षपछि महाराजगन्जस्थित प्रहरी एकेडेमीसँगैको भवनमा राखिएको थियो ।