अमेरिकी दूतावासको समन्वयमा डीभीका लागि नक्कली सर्टिफिकेट बनाउने १० जना पक्राउ

१८ माघ, काठमाडौं । नेपाल प्रहरीले अमेरिकाको डीभी लट्रीको  भिसा प्रक्रियाका सर्वसाधारणलाई नक्कली शैक्षिक प्रमाणपत्र बनाएर दिने गरेको आरोपमा १० जनालाई पक्राउ परेको छ । काठमाडौँ उपत्यका अपराध अनुसन्धान कार्यालयले भिसा प्रयोजनका लागि एसएलसी र प्लस टूको नक्कली शैक्षिक सर्टिफिकेट बनाइदिने गरेको पाइएपछि पक्राउ गरेको जनाएको छ । 

उनीहरुलाई गोप्य सूचनाका आधारमा अमेरिकी दूतावाससँगको समन्वयमा पक्राउ गरिएको हो । कार्यालयका अनुसार पक्राउ पर्नेमा ललितपुर घर भएका २५ वर्षीय सञ्जय महर्जन, चितवन घर भएका २५ वर्षीय सुमन ढकाल, सिराहा घर भएका २९ वर्षीय सक्षम अर्याल, धनुषा घर भएका ४२ वर्षीय विवेक उपाध्याय, मकवानपुर घर भएकी ३३ वर्षीया भगवती उप्रेती, लमजुङ घर भएकी रोना गुरुङ, सर्लाही घर भएका ३५ वर्षीय सुरज अधिकारी, दोलखा घर भएका २६ वर्षीय अशोक श्रेष्ठ, पर्सा घर भएका २८ वर्षीय पुरुषोत्तम मल्लिक र सर्लाही घर भएका २६ वर्षीय स्वर्णिम दाहाल रहेका छन् ।
 
प्रहरीले अमेरिकन दूतावासबाट विवेक उपाध्यायसहित ३ जनालाई नक्कली शैक्षिक प्रमाणपत्रसहित नियन्त्रणमा लिएको थियो । सो सम्बन्धमा अनुसन्धान गर्दै जाँदा नक्कली शैक्षिक प्रमाणपत्र बनाउने कार्यमा सञ्जय महर्जन लगायतको संलग्नता खुलेपछि प्रहरीको विशेष टोलीले उनीहरूलाई काठमाडौँका विभिन्न स्थानबाट पक्राउ गरेको हो । उनीहरुलाई जिल्ला प्रहरी परिसर टेकु पठाइएको छ ।