श्रमजीवी पत्रकारको तलब ४० प्रतिशत बढाउन गरिएको सिफारिस कार्यान्वयन गरः युनियन अध्यक्ष लम्साल

२५ माघ, काठमाडौं । नेपाल प्रेस युनियनका अध्यक्ष शिव लम्सालले श्रमजीवी पत्रकारहरूको पारिश्रमिक बढाउन गरिएको सिफारिसलाई सरकारी पक्षले अल्मल्याएर राख्न नमिल्ने बताएका छन् । उनले दुई वर्ष अघि पारिश्रमिक बढाउन गरिएको सिफारिसलाई सरकारले अझै रोक्ने, अल्मल्याउने र मालिकहरुसँग बार्गेनिङको टुल्स बनाउने काम भए त्यसको नतिजा राम्रो नहुने चेतावनी दिएका छन् । 

श्रमजीवी पत्रकारहरूको ४० प्रतिशत पारिश्रमिक बढाउन गरिएको सिफारिस तत्काल कार्यान्वयन हुनुपर्ने माग गर्दै अध्यक्ष लम्सालले सामाजिक सञ्जाल फेसबुकमा लेखेका छन्,‘ श्रमजीवी पत्रकारहरूको पारिश्रमिक र सुविधा ४० प्रतिशत बढाउनु पर्छ भनि आम सहमतिमा बुझाइएको प्रतिवेदन दुई वर्षसम्म पारित नगरी अल्झाएर राख्ने सरकारका उच्च पदाधिकारीहरू अहिले आएर मिडियाका मालिकाहरुसँग सो कुरालाई बार्गेनिङ टुल्सका रुपमा प्रयोग गर्न लागेको बुझिन्छ ।’

प्रेस युनियनसहित पत्रकारहरूका संगठन र न्यूनतम् पारिश्रमिक समितिसमेतको सो प्रस्तावलाई अघिल्लो साता बसेकाे मन्त्रिपरिषदको विषयगत समितिमा फालेर अल्मल्याउने काम गरिएको उनको भनाइ छ । भ्रष्टाचारका समाचारहरू सञ्चारमाध्यमहरूले फोटोसहित छापेपछि तिनीहरूले श्रमजीवीका पीडा सम्झिएर छलफल थालेका छन । प्रतिशोधकै लागि भए पनि श्रमजीवीका माग सम्झिएकोमा उनले व्यङग्यात्मक बधाई दिएका छन् । 

उनले सञ्चार तथा सूचना प्रविधि मन्त्रालयले सरकारबाट सञ्चारमाध्यमले पाउने लोक कल्याणकारी विज्ञापन निरन्तरताको सुनिश्चितता नगरी सञ्चारसम्बन्धी विधेयक अघि बढाएको विषयप्रति नेपाल प्रेस युनियनको गम्भीर ध्यानाकर्षण भएको बताएका छन् । लोक कल्याणकारी विज्ञापन र पारिश्रमिकका विषयमा भएका सहमति कार्यान्वयनमा जानुपर्ने उनको भनाइ छ ।