नेपालले माल्दिभ्सलाई दियो २२८ रनको विशाल लक्ष्य

१ फागुन, काठमाडौं । एसीसी वुमन्स प्रिमियर कपमा नेपाली टिमले माल्दिभ्सलाई दुई सय २७ रनको विशाल लक्ष्य दिएको छ । टस जितेर ब्याटिङ गरेको नेपालले निर्धारित २० ओभरमा चार विकेटको क्षतिमा दुई सय २७ रन बनाएको हो । 

ब्याटर रुबिना क्षेत्रीको शतक र पूजा महतोको अर्धशतकको मद्दतले नेपालले माल्दिभ्सलाई विशाल लक्ष्य दिएको हो । रुबिनाले पाँच छक्का र १० चौका प्रहार गर्दै ५८ बलमा एक सय १८ रन बनाइन् । नेपाली महिला खेलाडीको यो नै उच्च स्कोर हो । यसअघि सन् २०२१ मा सीता रानामगरले कतारविरुद्धको खेलमा ८२ रन प्रहार गरेकी थिइन् ।

यस्तै, पूजाले एक छक्का र पाँच चौका प्रहार गर्दै ३६ बलमा ५९ रन बनाइन् । नेपालले यसअघिको पहिलो खेलमा हङकङ र दोस्रो खेलमा भुटानलाई समान आठ विकेटले पराजित गरेको छ ।