सुनिल र विकल पौडेललाई थप १० दिन थुनामा राखिने

२ फागुन, काठमाडौं । गैरकानुनी सम्पत्ति आर्जन गरेको उजुरीको अनुसन्धानमा पक्राउ परेका विकल पौडेल र सुनिल पौडेललाई विशेष अदालतले थप १० दिन थुनामा राख्न अनुमति दिएको छ । 

म्याद थपका लागि बुधबार विशेष अदालतमा पेश भएकोमा थप १० दिन थुनामा राखेर अनुसन्धान अघि बढाउन अनुमति दिएको हो । विशेष अदालतका प्रवक्ता धनबहादुर कार्कीले बताए । 

नेपाल टेलिकमका पूर्व प्रबन्ध निर्देशक सुनिल पौडेल र सुरक्षण मुद्रण केन्द्रका पूर्व कार्यकारी निर्देशक विकल पौडेल दुवै जना गत १० माघमा पक्राउ परेका थिए ।  

गैरकानुनी सम्पत्ति आर्जनको अनुसन्धानको सिलसिलामा बयानका लागि बोलाउँदा उपस्थित नभएपछि अख्तियार दुरुपयोग अनुसन्धान आयोगले पक्राउ गरेको हो । 

दुवै जनामाथि यसअघि भ्रष्टाचारमुद्दा दायर भइसकेको छ ।  त्यही सिलसिलामा उनीहरूमाथि गैरकानुनी सम्पत्ति आर्जनको उजुरी समेत परेको थियो । अख्तियार पटक पटक बोलाउँदा नआएपछि उनीहरूमाथि निगरानी बढाइएको थियो । 

यसअघि दुई फरक–फरक भ्रष्टाचार मुद्दामा परेका विकल र सुनिल माथि गैरकानुनी सम्पत्ति आर्जन गरेको, विदेशमा कमिसन लुकाएको लगायतका आरोप छन् ।