मोटरसाईकलमा आएर श्रीमतीलाई तीन राउण्ड गोली

३ फागुन, काठमाडौं । दाङमा एक प्रहरीले नेपाल प्रहरीमै कार्यरत श्रीमतीको हत्या गरेका छन् । बिहिबार साँझ घोराहीको दामोदर चोकमा ड्युटीमा रहेकी महिला प्रहरी धनमायाँ थापालाई उनकै श्रीमान यमबहादुर झाँक्रीले गोली हानी हत्या गरेका हुन् । 

यमबहादुर नेपालगंज स्थित प्रहरी तालिम केन्द्रमा सहायक प्रहरी हवल्दार पदमा कार्यरत रहेको जिल्ला प्रहरी कार्यालय दाङका प्रहरी प्रमुख, एसपी रामबहादुर केसीले जानकारी दिए ।

घोराही स्थित वडा प्रहरी कार्यालयमा कार्यरत धनमायाँ बिहिबार बेलुका घोराही स्थित दामोदर चोकमा ड्युटिमा रहेका बेला उनका श्रीमान यमबहादुरले तीन राउण्ड गोली हानेका थिए । 

एसपी केसीका अनुसार मोटरसाईकलमा आएका यमबहादुरले धनमायाँ ड्युटिमा भएकै स्थानमा मोटरसाईकल रोकी गोली प्रहार गरेका थिए । ‘मोटरसाईकलमा आएको यमबहादुर झाँक्रीले महिला प्रहरी ड्युटिमा भएकै स्थानमा मोटरसाईकल रोकेर एक्कासी गोली चलाएको रहेछ,’ एसपी केसीले भने ‘महिला प्रहरी माथि तीन राउण्ड गोली प्रहार भएपछि उहाँको मृत्यु भएको हो ।’ गोली प्रहार गरि महिला प्रहरीको हत्या गर्ने यमबहादुरलाई प्रहरीले नियन्त्रणमा लिएको छ । उनि गोली प्रहार गरि घोराहीबाट लमही तर्फ भागेका थिए । 

प्रहरीले उनलाई घोराही लमही सडक खण्डको मसोट जंगलबाट नियन्त्रणमा लिएको हो । घटनाको कारण भने अहिले खुलिनसकेको एसपी केसीले बताए । ‘यो घटनाको एकिन कारण के हो रु अहिले खुुलिसकेको छैन,’ उनले भने ‘गोली प्रहार गर्ने व्यक्तिलाई नियन्त्रणमा लिएका छौँ,उ संग अनुसन्धान गरेपछि सबै खुल्ने छ ।’