महासमितिमा लगिने तीन प्रतिवेदनमाथि कांग्रेसमा छलफल सुरु

४ फागुन, काठमाडौं । नेपाली कांग्रेसको केन्द्रीय कार्यसमिति बैठकमा प्रस्तुत भएको तीन वटा प्रतिवेदनमाथि आजदेखि छलफल सुरु भएको छ । छलफल पार्टी केन्द्रीय कार्यालय सानेपामा सुरु भएको हो । 

बैठकमा उपसभापति पूर्णबहादुर खड्काको नीति, महामन्त्री गगन थापाको सांगठनिक र अर्का महामन्त्री विश्वप्रकाश शर्माको राजनीतिक प्रतिवेदनमाथि छलफल सुरु भएको हो । तीनवटै प्रतिवेदनहरू बिहीबारको बैठकमा पेश भएका थिए । ती प्रतिवेदनमा शुक्रबार र शनिबार दुई दिन छलफल हुने छ । 

केन्द्रीय सदस्यहरूले प्रस्तावहरूमाथि आफ्ना धारणा राख्ने र ती धारणाहरूलाई समेत समेटेर प्रस्तावलाई अन्तिम रुप दिने नेपाली कांग्रेसले जनाएको छ । महासमिति बैठक ७ फागुनदेखि सुरु हुँदैछ । प्रतिवेदनमाथि केन्द्रीय सदस्यहरूको धारणा बुझ्न दुई दिनसम्म छलफल चलाउने लागिएको कांग्रेसले जनाएको छ । ललितपुरको गोदावरीमा महासमितिको बैठकको तयारी पनि भइरहेको छ ।