क्रान्तिकारी युवा संगठनद्वारा डीडीसीका महाप्रबन्धक झामाथि दुर्व्यवहार

४ फागुन, काठमाडौं । मोहन वैद्य नेतृत्वको क्रान्तिकारी कम्युनिष्ट पार्टीका कार्यकर्ताहरुले दुग्ध विकास संस्थान (डीडीसी)का महाप्रबन्धक सञ्जिव झामाथि हातपातको प्रयास गर्दै कार्यकक्षमै दुर्व्यवहार गरेका छन् ।

शुक्रबार बिहान उनीहरु डीडीसीका महाप्रबन्धक झामाथि उनीहरुले हातपातको प्रयास गरेको एक कर्मचारीले बताए । उनका अनुसार कालोमोसो दल्न खोजेपछि केहिबेर कार्यकक्षमै हात हालाहाल भएको थियो । त्यसपछि क्रान्तिकारी युवा संगठन जिन्दावाद भन्दै उनीहरु त्यहाँबाट बाहिर निस्केर भागेका थिए ।

क्रान्तिकारी युवा संगठनले झाले भ्रष्टाचार र अनियमितता गरेकाले कालोमोसो दलेको बताएको छ । झामाथि दूध बेचेको करिब १७ करोड रुपैयाँ संस्थानमा दाखिला नगरी व्यक्तिगत प्रयोजनमा खर्च गरेको, डीडीसीले किसानबाट दूध खरिद गरेको ८५ करोड रुपैयाँ बक्यौता तिर्न आलटाल गरेको आरोप उनीहरुले लगाएका छन् ।