बुक फ्री फ्राइडे ( फोटो फिचर )

१२ फागुन, काठमाडौं । काठमाडौं महानगरपालिकाको बुक फ्री फ्राइडे हरेक शुक्रबार गर्ने अभियान अन्तर्गत यो शुक्रबार टेकुको ओन्देमा रहेको श्री सरस्वती निकेतन माविमा विद्यार्थीलाई सरसफाइ सम्बन्धी कार्यबारे व्यवहारिक ज्ञान दिइएको छ । 

 वातावरणीय स्वच्छता कायम गर्न आफू बस्ने ठाउँको मात्रै सफाइ नभइ आफू बस्ने वातावरण पनि सफा राख्नुपर्छ भन्ने व्यवहारिक ज्ञान दिनको लागि सरसफाइ सम्बन्धी व्यवहारिक क्रियाकलापको आयोजना गरिएको हो । 

 शुक्रबार दिउँसो स्कुलमा अध्ययनरत कक्षा ६ देखि ९ सम्मका करिब २०० विद्यार्थी, प्रधानमन्त्री स्वरोजगार योजनाका तर्फबाट २० र १२ नम्बर वडा कार्यालयबाट २० जना कर्मचारी सहित स्थानीयको समेत उपस्थितिमा सफाइ अभियान चलाइएको हो । 

 “हामीले आफ्नो वातावरण सफा राखेमा मात्रै आफु बस्ने ठाउँ पनि सफा हुन सक्छ भन्ने सिकाउनको लागि यो अभ्यास गराएका हौं । जस अन्तर्गत विद्यार्थीले आफ्नो शैक्षिक संस्थाको २०० मिटर क्षेत्र सफा गरेका हुन् । सफाइ गरिसकेपछि निस्कने फोहोर व्यवस्थापन पनि सफाइको अर्को पाटो हुन्छ । त्यो पाटोलाई पनि सम्बोधन गर्ने किसिमले हामीले फोहोरको वर्गीकरण र यसको व्यवस्थापनबारे पनि प्रयोगात्मक सिकाइको अभ्यास गरेका छौं ।” का। म। न। पा वडा नं १२ का वडाअध्यक्ष बाल कृष्ण महर्जनले भने । 

शुक्रबार आयोजना गरिएको सिकाइ अभ्यास फोहोर व्यवस्थापनको क्षेत्रमा काम गर्दै आएको निजी संस्था इन्फो नेपाल र काठमाडौं महानगरपालिकाको प्रत्यक्ष संलग्नता थियो । उक्त सिकाइ अभ्यासमा करिब ३०० जनाको प्रत्यक्ष उपस्थिति थियो ।

तस्विर : नेपाल फोटो लाइब्रेरी