अधिवेशनमा लाने एजेण्डबारे सहमति खोज्न बागमतीका सभामुखको निवासमा दलको बैठक

१५ फागुन, काठमाडौं । बागमती प्रदेशका सभामुख भुवन पाठकले निजी निवासमै सर्वदलीय बैठक राखेर सहमतिको प्रयास गरेका छन् । बागमती प्रदेशको हिँउदे अधिवेशन आज मंगलबार ३ बजे बोलाइएको छ । अधिवेशन सुरु हुनु अगाडी पाठकले प्रदेशसभामा प्रतिनिधित्व गर्ने दलहरूलाई बोलाएर सर्वदलीय बैठक राखेका छन् । पाठकको निवासमा बैठक जारी छ ।  

सर्वदलीय बैठकमा प्रदेश सरकार र विपक्षी दलबिच भएको सहमति र प्रदेशसभा बैठकको व्यवस्थापनको विषयमा छलफल भइरहेको बताइएको छ । यसअघि गत आइतबार बसेको सर्वदलीय बैठकमा संसदीय समितिको सभापति चयनको विषयमा कार्यदल गठन गरेर जाने सहमति भए पनि अन्य विषयमा सहमति हुन सकको थिएन ।

संसदीय समितिको नेतृत्व चयनका लागी कांग्रेसका संसदीय दलका सचेतक गोविन्द लम्सालको संयोजकत्वमा कार्यदल समेत बनाइएको छ । कार्यदलले १० दिनभित्र प्रतिवेदन बुझाउने छ । करिब साढे चार महिनापछि बागमती प्रदेशसभाको बैठक आज बस्दै छ । सरकार र विपक्षी दलहरूबिच सहमति जुट्न नसकेको अवस्थामा आजको बैठकले सुचारु र नियमितता पाउने  विषयमा शंका रहको छ । 

प्रदेश प्रमुख यादव चन्द्र शर्माले आज ३ बजेका लागि प्रदेशसभा बैठकको हिउँदे अधिवेशन आह्वान गरेका छन् । प्रदेश प्रमुख शर्माले बागमती प्रदेश सरकारको मन्त्रिपरिषद् सिफारिसमा नेपालको संविधान धारा १८३ उपधारा १ बमोजिम प्रदेशसभाको तेह्रौँ अधिवेशन बैठक आह्वान गरेका हुन् ।