एसियन लाइफ इन्स्योरेन्सको साधारणसभा आज, के-के छन् एजेण्डा ?

१८ फागुन, काठमाडौं । एसियन लाइफ इन्स्योरेन्सको आज वार्षिक साधारणसभा बस्दैछ। इन्स्योरेन्सले गत वर्षको नाफाबाट लगानीकर्तालाई ८.१६ प्रतिशत लाभांश वितरण गर्ने छ। कम्पनीको साधारण सभा होटल क्लासिक सिमरा, बारामा बिहान साढे ११ बजे सुरु हुनेछ। 

सभामा कम्पनीले आर्थिक वर्ष २०७९–८० को नाफाबाट शेयरधनीलाई ७.७५ प्रतिशत बोनस शेयर र कर प्रयोजनका लागि ०.४०७ प्रतिशत नगद गरी कुल ८.१६ प्रतिशत लाभांश वितरण प्रस्ताव पेश गर्नेछ। 

साथै, सभामा आर्थिक वर्ष २०७९–८० को वार्षिक प्रतिवेदन, नाफा–नोक्सान तथा नगद प्रवाह विषयमा पनि छलफल हुने, आर्थिक वर्ष २०८०–८१ का लागि लेखापरीक्षक नियुक्ति गर्ने र निजको पारिश्रमिक निर्धारण गर्ने अर्को एजेण्डा पनि छ। त्यसैगरी, बोनस शेयर वितरणपश्चात कायम हुने पुँजीमा ४२ प्रतिशत हकप्रद शेयर निष्काशन गर्ने सम्बन्धमा पनि विशेष प्रस्ताव पेश हुनेछ। 

साधारण सभा प्रयोजनका लागि कम्पनीले  फागुन ८ गते बुक क्लोज गरेको छ। तसर्थ, फागुन ८ भन्दाअघिसम्म कायम शेयरधनीले मात्र सभामा भाग लिन र प्रस्तावित लाभांश पाउन सक्नेछन्।