प्रधानमन्त्रीको कदम अप्रत्यासित भएको एकीकृत समाजवादीको निष्कर्ष

२१ फागुन, काठमाडौं । नेकपा (एकीकृत समाजवादी)ले प्रधानमन्त्रीको कदमका विषयमा गुण र दोषका आधारमा आफ्ना नीति स्पष्ट पार्ने निर्णय गरेको छ । पार्टी अध्यक्ष माधव कुमार नेपाल निवास कोटेश्वरमा बसेको समाजवादीको आकस्मिक सचिवालय बैठकले प्रधानमन्त्रीको कदम अप्रत्यासित भएको निष्कर्ष निकाल्दै गुण र दोषका आधारमा आफ्ना नीति स्पष्ट पार्ने निर्णय गरेको प्रवक्ता जगन्नाथ खतिवडाले जानकारी दिए । 

नयाँ समीकरणको उद्देश्य, प्रक्रिया र संरचना अझै स्पष्ट नभएको भन्दै प्रधानमन्त्रीले लिएको निर्णयका उद्देश्य,प्रक्रिया र संरचनाका बारेमा सबै बिषय अगाडि आएपछि तिनको गुण दोषका आधारमा आफ्ना नीतिहरू स्पष्ट पार्ने प्रवक्ता खतिवडाले बताए । उनले प्रधानमन्त्रीको कदमले मुलुकमा अन्योल देखिएको बताए ।

त्यस्तै नेकपा एकीकृत समाजवादीका सम्मानित नेता झलनाथ खनालले नयाँ घटनाक्रमपछि पार्टी वेट एण्ड सि मा रहेको बताए । उनले आफ्ना पार्टी स्वतन्त्र र क्रान्तिकारी पार्टी भएकाले मुलुकमा समाजवादी क्रान्ति लागू गर्न लागिपरेको र यसका लागि बामपन्थी एकतामा जोड दिने बताए ।

अहिले अरु पार्टीको बारेमा टीकाटिप्पणी नगर्ने उनको भनाइ छ । त्यस्तै उनले अहिलेको अवस्थामा पुरानो गठबन्धन टुटिसकेकाले पार्टीबाट सरकारमा गएका मन्त्रीहरू बिदा भएर आउने जिकिर गरे ।