सरकारमा जाने कि के गर्ने भन्ने ठोस निर्णय लिन नेकपा एसले बाेलायाे सचिवालय बैठक

२२ फागुन, काठमाडौं । नेकपा एकीकृत समाजवादीले केन्द्रीय सचिवालय बैठक बोलाएको छ । बुधवार पार्टी केन्द्रीय कार्यालय आलोकनगरमा बस्नेगरी केन्द्रिय सचिवालय बैठक बोलाइएको हो । 

पार्टीका केन्द्रीय कार्यालय सचिव जीवनराम श्रेष्ठका अनुसार बुधवार ११ बजे सचिवालय बैठक बोलाइएको छ । विकसित राजनीतिक घटनाक्रम र महाधिवेशनबारे बैठकमा छलफल हुनेछ । एमालेसहितको नयाँ समीकरण बनेपछि एकीकृत समाजवादीलाई सरकारमा आउन प्रधानमन्त्री पुष्पकमल दाहाल प्रचण्डले आग्रह गरिसकेका छन् ।

दुई नेताबीच भएको छलफलमा अध्यक्ष नेपालले प्रधानमन्त्री प्रचण्डलाई नयाँ समीकरण र नयाँ सरकारको उद्देश्य, योजना, नीति कार्यक्रम हेरेर मात्रै निर्णय गर्ने जवाफ दिएका छन् । नेता श्रेष्ठले सरकारमा गइहाल्ने सम्भावना नरहेको भन्दै पर्ख र हेरको नीति कायमै रहे पनि बैठकले ठोस निर्णय गर्न सक्ने बताएका छन् । 

अचानक साेमबार फेरिएको सत्ता गठबन्धनले कांग्रेससहितको सत्ता साझेदारीमा एक वर्षका लागि प्रधानमन्त्री हुने आकांक्षा पालेर बसेका नेकपा एकीकृत समाजवादीका अध्यक्ष माधवकुमार नेपाललाई अप्ठेरोमा पारेको छ । तर प्रधानमन्त्री प्रचण्डले सोमबार नै नेपाल निवास पुगेर सहकार्यका लागि प्रस्ताव गरेका छन् । 

सोमबार ठुला वामपन्थी दल नेकपा एमाले र नेकपा माओवादी केन्द्र सरकार गठन प्रक्रियामा फेरि एक ठाउँमा हुने बित्तिकै प्रधानमन्त्री ‘प्रचण्ड’ नेकपा 'एकीकृत समाजवादी' का अध्यक्ष एवं पूर्वप्रधानमन्त्री नेपालको स्वास्थ्यलाभको कामना गर्न सोमबार साँझ नै उनको निवास कोटेश्वर पुगेका थिए । 

केही दिनदेखि बिरामी भएर घरमा आराम गरिरहेका अध्यक्ष नेपाललाई प्रधानमन्त्री प्रचण्डले कोटेश्वर निवास पुगेर स्वास्थ्यलाभको कामना गरका थिए । प्रधानमन्त्री दाहालका साथमा नेकपा 'माओवादी केन्द्र' का वरिष्ठ उपाध्यक्ष नारायणकाजी श्रेष्ठ पनि अध्यक्ष नेपालको निवास कोटेश्वर पुगेका थिए ।