८ वटा दमकलले पनि नियन्त्रणमा आएन प्लाई उद्योगमा लागेको आगो

२८ फागुन, झापा । झापाको मेचीनगर १५ ज्यामिरगढीमा रहेको भगवती लेमिनेट्स प्लाइउड कारखानामा विहान ५ बजेदेखि लागेको आगो नियन्त्रणमा लिन मुस्किल भएको छ । आगो निभाउन ८ वटा दमकल प्रयोग गरिएको छ ।

प्लाई उद्योगमा लागेको आगो अझै नियन्त्रणमा आउन नसकेको झापा प्रहरी प्रमुख एसपी मिलन केसीले जानकारी दिए । उनका अनुसार उद्योगको कच्चा पदार्थमा बढी क्षति पुगेको छ । तयारी माल भने जोगिएको उनले बताए ।

आगो नियन्त्रणमा लिन नेपाली सेना, नेपाल प्रहरी र सशस्त्र प्रहरी तथा स्थानीयले प्रयास गरिहेका छन् । आगलागीको कारण अनुसन्धान भइरहेको र आगलागीबाट कति क्षति भयो भन्ने विषय अहिले नै यकिन नभएको उनले बताए । उद्योगमा नेपाली र भारतीयसहित हजारभन्दा बढी श्रमिक कार्यरत छन् भने करोडौँ रुपैयाँ लगानी भएको उद्योगीको भनाई छ ।