प्रचण्ड र ओलीले हुन्छ भनेपछि विश्वासको मत दिन सहमत भए माधव नेपाल

२९ फागुन, काठमाडौं । आफूले राखेका मागबारे प्रधानमन्त्री पुष्पकमल दाहाल प्रचण्ड र नेकपा एमालेका अध्यक्ष्य केपी शर्मा ओलीले सकारात्मक भनेपछि नेकपा एकीकृत समाजवादीका अध्यक्ष माधव नेपाल राष्ट्रिय सभा अध्यक्ष र विश्वासको मत दिन तयार भएका छन् । 

मंगलबार बिहान नयाँबानेश्वरमा सत्ता गठबन्धनमा आबद्ध दलका नेताबीच भएको छलफलमा उनले मत दिने सहमति गरेका हुन् । आफूहरू प्रधानमन्त्रीलाई विश्वासको मत दिन र राष्ट्रियसभा अध्यक्ष पदमा सत्ता गठबन्धनतर्फका उमेदवारका पक्षमा मतदान गर्न सहमत भएको एकीकृत समाजवादीका उपमहासचिव प्रकाश ज्वालाले जानकारी दिए । 

लिखित सहमतिबिना प्रधानमन्त्रीलाई विश्वासको मत नदिने अडान लिएका उनले ओलीले समेत तपाइका माग पुराहन्छन् भनेपछि मानेका थिए । प्रधानमन्त्रीको स्वकीय सचिव रमेश मल्लका अनुसार यसअघि चार दलबिच भएको ८ बुँदे सहमतिमा पनि एकीकृत समाजवादीले हस्ताक्षर गरेको छ । यस्तै आज हुने राष्ट्रिय सभा अध्यक्ष निर्वाचनमा एकीकृत समाजवादीले मतदान गर्न आफ्ना सांसदहरूलाई निर्देशन दिएको छ । 

सोमबार बसेको एकीकृत समाजवादीको संसदीय दलमा पार्टीलाई जानकारी नदिई मन्त्रीको नाम दिएकोमा नेपालको चर्को विरोध भएको थियो । लिखित सहमतिबिना प्रधानमन्त्रीलाई विश्वासको मत नदिने सांसदहरूले अडान लिएका थिए ।