अबको १५ महिनापछि माधव नेपाल प्रधानमन्त्री ?

३० फागुन, काठमाडौं । नेकपा एकीकृत समाजवादीले अबको १५ महिनापछि पार्टी अध्यक्ष माधवकुमार नेपाल देशको प्रधानमन्त्री बन्ने बताएको छ । सत्तारुढ दलमा भएको सहमति अनुसार माधव नेपाल प्रधानमन्त्री बन्ने भएका हुन् । 

समाजवादीले १५ महिनापछि पार्टी अध्यक्ष नेपाल प्रधानमन्त्री बन्ने सहमति भएको दाबी गरेको हो । पार्टी प्रमुख सचेतक मेटमणि चौधरीले गठबन्धनमा १५ महिनापछि नेपाल प्रधानमन्त्री बन्ने सहमति भएको पत्रकारहरूलाई जानकारी दिएका छन् ।

उनका अनुसार १५/१५ महिना प्रधानमन्त्रीको सहमति भएको छ । अबको १५ महिना पुष्पकमल दाहाल प्रचण्ड, त्यसपछि माधवकुमार नेपाल र अनि मात्र प्रधानमन्त्री केपी शर्मा ओली बन्ने सहमति भएको छ ।  

बुधबार बसेको संसदीय दलको बैठक पश्चात् सञ्चारकर्मीहरूसँग कुरा गर्दै प्रमुख सचेतक चौधरीले सहमतिअनुसार कार्यान्वयन नभए फरक तरिकाले सोच्ने बारेमा पनि निर्णय भएको बताए । उनले सहमति कार्यान्वयन हुने गरी प्रधानमन्त्री प्रचण्डलाई विश्वासको मत दिने निर्णय गरिएको जानकारी दिए ।