वालिङ नगरपालिकाकाले गर्यो पशु स्वास्थ्य शिविर

♦ मणी प्रसाद अर्याल

५ चैत, काठमाडौं । वालिङ नगरपालिकाले पशु सेवा शाखाको वार्षिक स्वीकृत कार्यक्रम अन्तर्गत वालिङ नगरपालिका भित्रका वडामा निःशुल्क पशु स्वास्थ्य शिविर सम्पन्न गरेको छ । केही समय अगाडि किसानहरुको उत्पादनको आधारमा अनुदान दिने मनसायले प्रति लिटर दूधमा दश रुपैया अनुदान दिने निर्णय गरेको नगरपालिकाले कृषकको मनोबल उच्च बनाउनको निम्ति घरमै गएर पशुको स्वास्थ्य उपचार र निःशुल्क औषधि वितरण गरिएको छ । 

वालिङ  नगरपालिका वडा न १०,१२,१३ र १४ मा गाई, भैँसी, बाख्रा, बंगुर,कुकुर गरि करिब चार हजार पशुको स्वास्थ्य जाँच गरिएको नगरपालिकाले जानकारी दिएको छ । पशु स्वास्थ्य शिविरमा आन्तरिक र बाहिरी परिजिवि, बाझोपन, गोवर परिक्षण, थुनेलो परिक्षण, बन्धायकरण रेविज भ्याक्सिन र औषधि निःशुल्क वितरण गरिएको स्वास्थ्य शाखा प्रमुख माधव डुम्रेले जानकारी दिए । 

पशुहरूमा रेविज भ्याक्सिन र सरुवा रोगबाट मानिसलाई हुने जोखिमको न्युनिकरणको र स्वस्थ मासु, दूध उत्पादनलाई प्रोत्साहन र किसानहरुको सहजताको लागि यो कार्यक्रम लागु गरिएको नगरप्रमुख कृष्ण खाँणले जानकारी दिए । 

उत्पादनको आधारमा कृषकलाई अनुदान दिने र वालिङ नगरपालिका भित्रका नागरिकले उत्पादन गरेको मासु, दूधको बजार व्यवस्थापनमा नगरपालिका प्रतिबद्ध रहेको र वजार ग्यारेन्टी गर्ने नगर उपप्रमुख कविता तिवारी गैह्रेले जानकारी दिए । 

किसानहरूले घरमै पशु चौपायाको स्वास्थ्य परीक्षण गर्न पाउँदा खुसी भएका छन । समय समयमा कृषकहरूको आवश्यकतालाई मध्यनजर गरि नगरपालिकाले प्रभावकारी रुपमा यस्ता कार्यक्रमहरू सञ्चालन गर्नुपर्ने कृषकहरूको भनाइ छ ।