सीआईबीले लिएको दुइदिने बयानमा महराद्वारा आरोप अस्वीकार

८ चैत, काठमाडौं । नेपाल प्रहरीको केन्द्रीय अनुसन्धान ब्यूरो (सीआईबी) ले सुन तस्करी प्रकरणमा पक्राउ परेका माओवादीका उपाध्यक्ष कृष्णबहादुर महराको एक चरणको बयान सकिएको जनाएको छ । काठमाडौं जिल्ला सरकारी वकिल कार्यालयमा बुधबार र बिहीबार महरासँग बयान लिइएको थियो । महराले सुन प्रकरणमा आफू निर्दोश रहेको बयान दिएका छन् ।  

भन्सारमा अड्किएको इलेक्ट्रिक सिगरेट–भेप छुटाउन महराको मोबाइलबाट फोन गएको देखिएपछि उनलाई पनि छानबिनको दायरामा ल्याउनुपर्ने भएपनि सीआईबीले त्यतिबेला ल्याएको थिएन । यही प्रकरणमा महराका छोरा राहुल यसअघि नै पक्राउ परेर हाल पुर्पक्षका लागि थुनामा छन् । 

महरा चैत ५ गते कपिलबस्तुबाट पक्राउ परेका थिए । उनको स्वास्थ्य अवस्थालाई ध्यान दिन र उपचारको व्यवस्था मिलाउन अदालतले भनेपछि महरालाई नर्भिक अस्पतालमा राखिएको छ । प्रहरीले बयानका लागि ल्याउने र त्यसपछि अस्पताल पुर्याउने काम गरिरहेको छ ।

महराले सुन प्रकरणमा आफ्नो संलग्ना अस्वीकार गरेका छन् । बिहीबार सरकारी वकिल कार्यालयमा भएको बयानमा उनले संलग्नता अस्वीकार गरे । सीआईबीले आज पनि बयान लिइएको थियो । सरकारी वकिलको कार्यालयका एक अधिकृतले एक चरणको बयानको काम सकिएको र अब थप आवश्यक प्रक्रिया सीआईबीले अघि बढाउने बताए ।

गत साउन २ मा ‘ब्रेक सु’मा लुकाएर ल्याइएको ६१ किलो सुन र २०७९ पुसमा विद्युतीय चुरोटमा ल्याइएको ९ किलो सुन तस्करीमा संलग्न चिनिया नागरिकसँग उनको नाम जोडिएको छ । त्यसबेला सिआइबीले उनलाई बयान कागज गरेर मात्रै छाडेको थियो ।