प्रदेश भागबन्डा मिलाउन ओली पुगे सिंहदरबार

९ चैत, काठमाडौं । संघीय सरकार बनेपछि प्रदेशको भागबण्डा मिलाउन नेकपा एमालेका अध्यक्ष केपी शर्मा ओली कसरतमा जुटेका छन् । भरसक चार वटा प्रदेशमा एमाले नेतृत्वको सरकार बनाउने पक्षमा ओली देखिएका छन् । यसबारे छलफलका लागि उनी प्रधानमन्त्री पुष्पकमल दाहाल प्रचण्डलाई भेट्न सिंहदरबार पुगेका छन् । 

सिंहदरबारस्थित प्रधानमन्त्री कार्यालयमा दुई नेताबीच प्रदेश सरकारको नेतृत्का विषयमा छलफल चलेको छ । केन्द्रमा नयाँ गठबन्धन बनाएका माओवादी र एमालेबीच प्रदेश सरकारको नेतृत्व बाँडफाँट हुन बाँकी छ । दुई नेताको भेटमा यो सहितका विषयमा कुराकानी भएको छ । 

सिंहदबारमा जारी दुई नेताबिचको छलफलमा समाजवादी मोर्चा, सरकारका काम कारबाही, प्रदेश भागबण्डा लगायतका विषयमा छलफल भएको बुझिएको छ । 
 
फागुन २१ मा नयाँ गठबन्धन बनेर एमाले सत्ता सहयात्री भएपछि प्रचण्ड र अध्यक्षबिचको भेटघाट र छलफल बाक्लिँदै आएको छ । शुक्रबार बिहान बालुवाटारमा बसेको समाजवादी मोर्चाको बैठकले एमालेलाई समेत मोर्चामा सहभागी गराउनेबारे छलफल भएको थियो ।
 
सो छलफलले अध्यक्ष ओलीसँग प्रचण्ड र नेता माधव नेपालले कुराकानी गर्ने निर्णय गरेको थियो । त्यसअघि बिहीबार बेलुका नेकपा महासचिव विप्लव र नेता प्रकाण्ड ओली निवास बालकोट पुगेर २ घण्टा छलफल गरेका थिए ।