कांग्रेसले इलाम र बझाङमा हुने उपनिर्वाचनका लागि आज उम्मेदवार टुंग्याउने

१८ चैत, काठमाडौं । नेपाली कांग्रेसले इलाम-२ मा उपनिर्वाचनका लागि आज उम्मेदवार चयन गर्ने भएको छ । इलाम-२ मा आउने वैशाख १५ गते उपनिर्वाचन हुँदैछ । प्रतिनिधि सभाअन्तर्गत इलाम-२ र बझाङको प्रदेश सभा (क) सदस्यका लागि हुने उपनिर्वाचनको उम्मेदवार आज चयन गर्ने बताइएको छ । 

नेकपा एमालेले सुवास नेम्वाङका छोरा सुहाङलाई उमेदवार बनाएर प्रचार अभियान थालिसकेको छ ।  राष्ट्रिय स्वतन्त्र पार्टीले शनिबार उम्मेदवारी घोषणा गरेको छ । यसअघि नेकपा एमाले, नेकपा एकीकृत समाजवादी, राष्ट्रिय प्रजातन्त्र पार्टीलगायतले उम्मेदवार घोषणा गरेर प्रचार शुरू गरिसकेका छन् । 

कांग्रेसले भने उम्मेदवारको टुंगो लगाउन सकेको छैन । कांग्रेसको क्षेत्र, जिल्ला, प्रदेश समितिले समेत नाम सिफारिस गरेर पठाएको हप्ता दिनभन्दा बढी हुँदा पनि केन्द्रले उम्मेदवार घोषणा गर्न नसकेको हो । कांग्रेसको इलाम जिल्ला कार्यसमितिले भेषराज आचार्य, केशव थापा, डम्बर खड्का, नगेन्द्र कुमाल, रमेश लिङ्दम, चन्द्रमाया लिम्बु र शान्तिकला तामाङको नाम केन्द्रमा पठाएको छ । 

कांग्रेस सभापति शेरबहादुर देउवाले चैत १८ गते उम्मेदवारको टुंगो लगाउने बताएका थिए । उनले एक चरण पदाधिकारी तहमा उम्मेदवारबारे छलफल गरिसकेका छन् । आज देउवाले महामन्त्री र पदाधिकारीसँग छलफल गरेर उम्म्ेदवारको टुंगो लगाउने बताइएको छ ।