गठबन्धन फेरिँदा सशस्त्रका एसएसपीलाई बढुवामा घाटा

१८ चैत, काठमाडौं । प्रधानमन्त्री पुष्पकमल दाहाल 'प्रचण्ड'ले गठबन्धनको काँध फेरेसँगै सशस्त्र प्रहरीका एक प्रहरी वरिष्ठ उपरीक्षक (एसएसपी)लाई घाटा लागेको छ । नेपाली कांग्रेसका सभापति शेरबहादुर देउवाका स्वकीय सचिव भानु देउवाका बहिनी ज्वाई भएका नाताले सधैं अवसर लिइरहेका एसएसपी दीपेन्द्र कुवँरलाई घाटा लागेको हो ।  

प्रहरी नायव महानिरीक्षक (डीआईजी) बढुवामा सिफारिस आवेदन दिएका कुँवरलाई सत्ता गठबन्धनको झट्का लाग्दा दीपक अधिकारीले अवसर पाएका छन् ।  बढुवा समितिको सचिवालयले एसएसपी दीपक अधिकारीलाई डीआईजी बढुवामा सिफारिस गरेसँगै उनले सशस्त्र प्रहरी मूख्यालयको प्रबन्ध शाखाबाट बिदा लिने तयारीमा लागेको स्रोतले जनाएको छ ।

उनलाई सशस्त्र प्रहरी नियमावली २०७२ को नियम ३९ को उपनियम (१) को (ख) बमोजिम बढुवा सिफारिस गरिएको समितिले जनाएको छ । सशस्त्र प्रहरीमा एक जना डीआईजीको दरबन्दी रिक्त थियो। बढुवा सिफारिसउपर चित्त नबुझे नियमावलीको ५५ मा व्यवस्था भएबमोजिम सात दिनभित्र उजुरी सुन्ने समितिमा उजुरी दिन सकिने सचिवालयले जनाएको छ ।

एसएसपी अधिकारी प्रधानमन्त्री प्रचण्ड निकट रहेका कर्मचारी हुन् । नेपाली कांग्रेस निकट रहेका कृष्ण ढकालले पनि बढुवा लागि कोसिस गरेका थिए । तर उनलाई छाडेर प्रधानमन्त्रीले अधिकारीलाई डीआईजी सिफारिस गर्न दबाब दिएको स्रोतको दावी छ । एक महिना अघि नै बढुवाका लागि आवेदन मागिएको भएपनि ढिलो गरी बढुवा सिफारिस गरिएको हो । अधिकारी हाल पोखरा लामपाटन तालिमकेन्द्रमा कार्यरत रहेका छन् । 

सशस्त्रका एसएसपी कुँवरको डीआईजी हुने सपनामा कालो बादल !