परीक्षा हलभित्र काजमा खटिएका कर्मचारीको दादागिरी

दीपक शर्मा 

१८ चैत बर्दिया । एसइइ परीक्षा चलिरहेको समयमा पास नभएका झुन्डहरु परीक्षा हल भित्र प्रवेश गरी विद्यार्थीलाई थर्काएको पाइएको छ । बर्दियाको मधुवन नगरपालिकामा आज आइतबार परिक्षा सुरु भएको केहि समयमै नगरपालिकामा काजमा रहेका खगेन्द्र खनाल र गणेश रावतले २ वटा विद्यालयको परीक्षा हल भित्र प्रवेश गरी विद्यार्थीलाई थर्काएको पाइएको हो । 

खनाल र रावत शुक्र मावि र भृकृटि माविमा प्रवेश गरी परीक्षा चलिरहेको कक्षा कोठामा विद्यार्थीले परीक्षा दिइरहेको अवस्थामा विद्यार्थीलाई चिट चोर्न पाइँदैन , चिट देखेको पाए भने क्लासबाट बाहिर निकालिदे धम्कि दिदै हो हल्ला गरेको एक परीक्षार्थीले बताए । काजमा नगरपालिकामा बस्दै आएका खगेन्द्र खनाल र गणेश रावतले पास समेत नलिएको बुझिएको छ ।

परीक्षा केन्द्रमा केन्द्राध्यक्षले पास देखाउन भनेपछि पास छ भन्दै परिक्षा हल भित्र छिरेका थिए । यस विषयमा मधुवन नगरपालिकाका प्रमुख प्रशासकीय अधिकृत मान बहादुर गिरिले आफूले यो विषयमा जानकारी पाएको वास्तविकता बुझन बाँकी रहेको बताए । उता मधुवन नगरपालिका शिक्षा शाखा नारायण प्रसाद खनालले गणेश रावत भन्ने व्यक्ति परीक्षाहल भित्र प्रवेश गरेको बताए ।

शिक्षा विकास तथा समन्वय इकाई बर्दियाका इकाई प्रमुख रेविका अमात्यले पास कसैलाई व्यवस्था नगरिएको तर स्थानिय पालिकाका शिक्षा प्रमुखलाई जिम्मेवारी दिइएको बताए । दुई जनाको दादागीरीले परीक्षा दिइरहेका विद्यार्थीहरूमा कस्तो खालको मानसिक दवाव परेको होला आफै अनुमान लगाउन सकिन्छ । पास नभएकालाई परीक्षा हल सम्म जाने पहुच र दादागिरीकै भरमा देखिएको छ ।