सार्वजनिक खरिद अनुगमनले माग्यो २७ जना ठेकेदारसँग सातदिने स्पष्टीकरण

१९ चैत, काठमाडौं । सार्वजनिक खरिद अनुगमन कार्यालयले समयमा काम सम्पन्न नगरेको र तोकिए अनुसारको गुणस्तरीय काम नभएको भन्दै विभिन्न २७ निर्माण कम्पनीका ठेगेदारहरुसँग सातदिने स्पष्टीकरण मागेको छ । कार्यालयले सूचना जारी गर्दै यसअघि ३० दिनभित्र स्पष्टीकरण दिन भएको तर, नआएको भन्दै सात दिने स्पष्टीकरण मागेको हो । 

प्रधानमन्त्री तथा मन्त्रिपरिषद कार्यालय मातहत रहेको उक्त कार्यालयले २७ निर्माण कम्पनीको सूचीमा भारतका दुई र चीनको एक कम्पनीसमेत परेका छन् । यो स्पष्टीकरण चित्तबुझ्दो नभए सार्वजनिक खरिद अनुगमन कार्यालयले कालोसूचीमा राख्ने जनाएको छ । कालोसूचीमा परेमा उनीहरुले तोकिएको अवधिभर सार्वजनिक निकायको खरिद प्रक्रियामा सहभागी हुन नपाउने व्यवस्था छ । 

 सात दिनको अवधिमा पनि स्पष्टीकरण पेश नगरेमा कालोसूचीमा राखिने कार्यालयद्वारा जारी सूचनामा भनिएको छ । कालोसूची राख्न सिफारिस हुनेमा रोशिस कन्स्ट्रक्सन, उमंग ट्रेडर्स, पौराई बाबा कन्स्ट्रक्स, साहनी विल्डर्स, न्यू जगतदेवी निर्माण सेवा, विवश इन्टरनेसनल कन्स्ट्रक्सन एण्ड सप्लायर्स, शोभा विल्डर्स एण्ड सप्लायर्स, नेपाल भुमी कन्स्ट्रक्सन कम्पनी लगायत रहेका छन् ।