सिराहामा भारतीय गाडीमा आएका लुटेराले हतियार देखाएर लुटे मनि ट्रान्सफरको साढे १५ लाख

२५ चैत, सिराहा । सिराहामा कुशेश्वर यादवले सञ्चालन गर्दै आएको मनी ट्रान्सफरबाट दिउँसै साढे १५ लाख रकम लुटिएको छ । हतियार देखाएर मनि ट्रान्सफरको रकम लुटेको प्रहरीले जनाएको छ । सिरहा सदरमुकाममा आइतबार बिहान ११ बजेको समयमा विष्णुपुरमा सञ्चालित शिव मनी ट्रान्सफरका लागि पुरुषोत्तम यादवले लिएर जाँदै गरेको उक्त रकम भारतीय मोटरसाइकलमा आएका हतियारधारी समूहले लुटेका हुन् ।

सिराहा सदरमुकामबाट विष्णुपुर गाउँपालिकामा रहेको उक्त मनि ट्रान्सफरको लागि १५ लाख ५० हजार रकम ल्याइरहेको अवस्थामा लुटिएको हो । जिल्ला प्रहरी कार्यालयदेखि उत्तर महिसोथा जाने बाटो नजिकबाट हतियार देखाएर रकम लुटिएको हो ।
 
भारतीय नम्बरको मोटरसाइकलमा आएका लुटेराहरूले स. ९ प ६३१० नम्बरको मोटरसाइकलमा रकमसहित आइरहेका पुरुषोत्तम यादवलाई हतियार देखाएर नगद सहित २ थान ग्लोबल आईएमई बैंकको र ३ वटा राष्ट्रिय वाणिज्य बैंकको खालि चेक र मोबाइल समेत लुटेर लगेको जिल्ला प्रहरी कार्यालयले जनाएको छ ।

जिल्ला प्रहरी कार्यालय सिराहाका सूचना अधिकारी डीएसपी मुक्तिनाथ सापकोटाका अनुसार लुटिएको रकम विष्णुपुर गाउँपालिका १ का कुशेश्वर यादवले सञ्चालन गर्दै आएको मनी ट्रान्सफरको हो । यादवले दिएको बयान अनुसार लुटेरामध्ये मोटरसाइकल चलाउनेले क्रिम कलरको र पछाडि बस्नेले रातो रंगको कपडा लगाएको थाहा भएको छ । घटनाबारे थप अनुसन्धान भइरहेको प्रहरीले जनाएको छ ।