सभामुख र शीर्ष नेताहरूबीचको छलफल दिउँसो २ बजेका लागि सर्‍यो

२६ चैत, काठमाडौं । सभामुख देवराज घिमिरे र शीर्ष नेताहरूबीचको छलफलको सरेको छ । सोमबार  बिहान साढे १० बजे सिंहदरबारमा बोलाइएको बैठक दिउँसो २ बजेका लागि सारिएको छ । प्रमुख प्रतिपक्षी नेपाली कांग्रेसले प्रतिनिधि सभामा निरन्तर उठाइरहेको प्रश्नका सम्बन्धमा छलफल गर्न सभामुख घिमिरेले शीर्ष नेताहरूलाई छलफलमा बोलाएका हुन् ।

छलफलमा प्रधानमन्त्री पुष्पकमल दाहाल प्रचण्ड, विपक्षी दलको नेता शेरबहादुर देउवा, नेकपा एमालेका अध्यक्ष केपी ओली, राष्ट्रिय स्वतन्त्र पार्टी 'रास्वपा'का सभापति समेत रहेका उपप्रधान तथा गृहमन्त्री रवि लामिछानेलाई बोलाइएको छ ।

गत फागुन २४ गतेदेखि कांग्रेसले उपप्रधान तथा गृहमन्त्री लामिछानेमाथि संसद्‌मा प्रश्न उठाउँदै आएको छ । लामिछाने सहकारीको रकम हिनामिनाको आरोपी रहेकाले संसदीय छानबिन समिति बनाउनुपर्ने कांग्रेसको माग छ । सोमबार बिहान बसेको कांग्रेस शीर्ष नेताहरूको बैठकले पनि संसदीय छानबिन समिति गठनको माग सशक्त ढंगले उठाउने निर्णय गरेको छ । 

यसअघि चैत २१ गते बसेको प्रतिनिधि सभाको बैठकमा नेपाली कांग्रेसका महामन्त्री समेत रहेका सांसद विश्वप्रकाश शर्माले अर्को बैठकमा संसदीय छानबिन समिति लिएर आउन सरकारलाई आग्रह गरेका थिए । प्रतिनिधि सभाको बैठक चैत २७ गते बस्दैछ । त्यसअगाडि सभामुखले शीर्ष नेताहरूसँग छलफल गर्न लागेका हुन् ।

कांग्रेसले सहकारी प्रकरणको छानविनको लागि संसदीय समिति गठन गर्न सरकार तयार नभए यही चैत २७ देखि संसद बैठक नै अबरुद्ध गर्ने चेतावनीसमेत दिएको छ।