प्रधानमन्त्री प्रचण्डले तारन्तार गरेपछि देउवाको सट्टा गगन र सिटौला गए बालुवाटार

२७ चैत, काठमाडौं । प्रधानमन्त्री पुष्पकमल दाहाल प्रचण्डले बोलाएपछि नेपाली कांग्रेसका महामन्त्री गगनकुमार थापा र राष्ट्रिय सभा सदस्यसमेत रहेका नेता कृष्णप्रसाद सिटौला प्रधानमन्त्री निवास बालुवाटार पुगेका छन् । उनीहरूसँग प्रधानमन्त्री प्रचण्डले संसद अवरोध खुलाउने विषय छलफल गरेका छन् । 

प्रचण्डले संसदीय दलको बैठक बसिरहेको समयमा कांग्रेस सभापति शेरबहादुर देउवालाई तपाई नै आउनुपर्यो भनेर फोन गरेका थिए । तर, देउवा त्यो छलफलमा गएनन् । प्रमुख प्रतिपक्ष कांग्रेसको विरोधका बाबजुद सरकारका तर्फबाट गृहमन्त्री रवि लामिछानेले विधेयक पेश गर्ने तयारी गरेपछि कांग्रेस आक्रोशित बनेको छ । 

सदनमा पेश गर्न लागिएको विधेयक र संसदीय छानबिन समितिको विषयमा छलफल गर्न प्रधानमन्त्री प्रचण्डले  बोलाएका हुन् । सोमबार सभामुख देवराज घिमिरेले बोलाएको छलफलमा सत्तापक्ष र विपक्षका आफ्नै अडान दोहोरिएपछि निष्कर्षमा पुग्न सकेको थिएन । कांग्रेसले सहकारी ठगी प्रकरणको छानबिनका लागि संसदीय समिति गठन बटम लाइन बनाएको छ भने सत्तापक्ष तयार भएको छैन ।

प्रधानमन्त्री प्रचण्डले कांग्रेस सभापति देउवालाई भेटवार्ताका लागि बोलाएका थिए । सभापति देउवाले महामन्त्री थापासहित सिटौलालाई पठाएका हुन् । सभापति देउवाले नयाँ बानेश्वरमा संसदीय दलको बैठक चलिरहेको बेला प्रचण्डले बोलाएको जानकारी गराएका थिए । त्यसलगत्तै बैठक चलिरहेकै बेला थापा र सिटौला बालुवाटार हिँडेका हुन् ।

प्रतिनिधि सभा बैठक सञ्चालन लगायत समसामयिक विषयमा छलफल गर्न प्रधानमन्त्रीले कांग्रेस नेतासँग छलफल गर्न लागेका हुन् । आज प्रतिनिधि सभा बैठक बस्दैछ । तर, कांग्रेसले भने गृहमन्त्री रवि लामिछानेमाथि संसदीय छानबिन समिति गठन नभए बैठक चल्न नदिने बताउँदै आएको छ ।