लगातारको प्रयास असफल भएपछि सभामुखले स्थगित गरे आजको संसद बैठक

२७ चैत, काठमाडौं । हिजोदेखि लगातार संसद खुलाउने विषयमा प्रयास गर्दै आएका सभामुख देवराज घिमिरेले दुवै पक्ष सहमतिमा नआएपछि प्रतिनिधि सभाको बैठक भोलिसम्मका लागि स्थगित गरेका छन् । अर्को बैठक बुधबार बिहान ११ बजे बस्ने गरी स्थगन गरिएको सभामुख देवराज घिमिरेको सचिवालयले जानकारी गराएको छ ।

मंगलबार बिहान ११ बजेका निम्ति बोलाइएको बैठक सभामुख र प्रमुख दलका शीर्ष नेताहरू बीचको छलफलका कारण ढिला गरी बसेको थियो । संसद् बैठक सुरु भए लगत्तै नेपाली कांग्रेसले संसदीय छानबिन समिति गठनको माग गर्दै अवरोध गरेको थियो । 

त्यसपछि सभामुखले १५ मिनेटपछि बस्ने गरी बैठक स्थगन गरेका थिए । तर, सहमति हुन सकेन र बुधबार बस्ने गरी बैठक स्थगन गरियो । सहकारीको रकम ठगी प्रकरणमा उपप्रधान एवं गृहमन्त्री रवि लामिछानेको नाम मुछिएको विषयमा कांग्रेसले संसदीय छानबिन समिति गठनको माग गरिरहेको छ ।