मौलापुर दलित बस्तीमा आगलागी हुँदा लाखौंको क्षति

२८ चैत, रौतहट । रौतहटको मौलापुर नगरपालिका-२ मर्यादपुर एकीकृत दलित वस्तीमा गएराति भएको आगलागी बाट तीनवटा घर गोठ जलेर नष्ट हुनुका साथै चार चौपायाको मृत्यु भएको छ।

आगलागीबाट ब्रम्हदेव महरा चमार ,जगदेव महरा चमार ,रामचन्द्र महरा चमारको फुसको घर गोठ जलेर नष्ट भएको छ ।  घर गोठभित्र रहेका गैस सिलिन्डर, खदान्न समाग्री , लत्ताकपडा पुर्ण रूपमा जलेर नष्ट हुनुका साथै ४ वटा बाख्राको मूल्य भएको इलाका प्रहरी कार्यालय मौलापुरका प्रमुख इन्स्पेक्टर कुशल बर्तौलाले बताएका छन।

आगलागीबाट पाँच लाख,४५ हजार रुपैयाँ बराबरको क्षति भएको जिल्ला प्रहरी प्रवक्ता डीएसपी एलिजा गिरीले बताएकी छिन। आगलागी प्रहरी र स्थानीयबासीको सहयोगमा आगो नियन्त्रणमा आएको जिल्ला प्रहरी कार्यालय रौतहटले जनाएको छ।

गर्मीसँगै हावाहुरी चल्न सुरु भएपछि रौतहटमा दैनिकजसो आगलागीको घटना भइरहेको छ। जिल्लाको १८ स्थानीय तह मध्ये गौर नगरपालिका र चन्द्रपुर नगरपालिकामा मात्र बारुण यन्त्र दमकल रहेकाले आगलागीको घटना हुँदा तुरुन्तै नियन्त्रणमा समस्या हुने गरेको जानकारहरुले बताउँदै आएका छन्।