सहकारी ठगीबारे सीआईबीले सुरु गरेको अनुसन्धान लामिछाने गृहमन्त्री भएपछि किन रोकियोः कांग्रेस

२८ चैत, काठमाडौं । नेपाली कांग्रेसले सुर्यदर्शन सहकारीमा भएको ठगीबारे नेपाल प्रहरीको केन्द्रीय अनुसन्धान ब्यूरो ( सीआईबी) ले सुरु गरेको अनुसन्धान रवि लामिछाने गृहमन्त्री भएपछि किन रोकिएको हो भन्दै सरकारसँग प्रश्न गरेको छ । कांग्रेसले सीआईबीका दुई जना प्रहरी प्रदीप क्षेत्री र रवि घिमिरेलाई पोखरामा छानबिन गर्न पठाइएको थियो तर, रवि लामिछाने गृहमन्त्री भएपछि उनी माथिको अनुसन्धान रोकिएको बताएको छ । 

उपप्रधान तथा गृहमन्त्री भएपछि राष्ट्रिय स्वतन्त्र पार्टी (रास्वपा)का सभापति रवि लामिछाने माथिको प्रहरी अनुसन्धान रोकिएको आशंका गर्दै प्रमुख प्रतिपक्षी नेपाली कांग्रेसले सरकारमाथि प्रश्न गरेको हो । बुधबार प्रतिनिधि सभामा आकस्मिक समय लिएर पार्टीको तर्फबाट बोल्दै सांसद रामहरि खतिवडाले यो छानबिन किन रोकिएको हो भनेर प्रश्न गरे । 

उनले भने, ‘काठमाडौंबाट सीआईबीले दुई जना प्रहरी प्रदीप क्षेत्री र रवि घिमिरेलाई पोखरामा छानबिन गर्न पठायो । छानबिनले लामिछाने सहकारी ठगीमा संलग्न भएको रिपोर्ट तयार गर्दै थियो, सत्ता समीकरण परिवर्तन भएपछि यो रिपोर्ट पनि परिवर्तन भयो भन्ने हामीलाई आशंका भयो ।’ जसमाथि छानबिन हुँदै थियो उही गृहमन्त्री भएपछि सहकारी पीडितहरू झन् समस्यामा परेको उनको भनाइ छ । आफूहरूले निष्पक्ष छानबिन आयोग बनाउन वा संसदीय छानबिन समिति बनाउन माग गर्दै आएको तर सरकारले नसुनेको उनले बताए । 
 
खतिवडाले संसद चल्न नदिने सरकारको नियतप्रति आशंका रहेको बताए । हामी संसद अवरोध गर्न चाहँदैनौँ । संसदभित्र पसेर संसदमाथि प्रहार गर्ने ठगी गर्ने र संसद चल्न नदिने सरकारको नियतप्रति हाम्रो आशंका छ । त्यसैले निष्पक्ष छानबिन गर्न संसदीय समिति माग गर्छाैं, उनले भने । गएको पुसपछि सहकारी ठगीको कुरा सतहमा आउन थालेको बताए । 
 
पोखराका सुर्यदर्शन सहकारी पीडित झन पीडित भएको उनको भनाइ छ ।  प्रधानमन्त्री पुष्पकमल दाहाल प्रचण्डले गठबन्धनको प्रमुखको रुपमा बोलेर दोषी उम्काउने प्रयास गरेको आरोप लगाए । प्रधानमन्त्रीले गठबन्धनको प्रमुखको रुपमा जवाफ दिन थाल्नुभयो । जो दोषी थियो त्यसलाई उम्काउने देखेपछि आयोग गठन होस्, उनले भने, कोहीसँग ईर्ष्या र द्धसले काम गर्न चाहँदैनौँ । गल्ती छैन भने छानबिन तयार होस् भन्न किन सक्दैनन् भनि प्रश्न गरे । 

फैसला सुनाउने अधिकार सरकारलाई नभएको उनले बताए । गृहमन्त्रीलाई आफ्नै मन्त्रीले पैसा डुब्यो भन्दा पनि छानबिन गर्न नसकेको बताए । मन्त्रीले नै मेरो पैसा उठाइदिए दुई तीन लाख रुपैयाँ दिन्छु भन्नुभएछ । यो कस्तो पार्टी र सरकार रहेछ ? उनले सोधे, पैसा उठाउँदा पनि पैसा दिने कुरा मन्त्रीले गरेको त्यो पनि हामी जवाफ चाहन्छौं ।