यसरी सफा गरिँदै छ धोबीखोला [ फोटोफिचर ]

♦ मनिष अर्याल

२८ चैत, काठमाडौं । हरियो ज्याकेट लगाएर मान्छेहरू खोलामै पसेर काम गरिरहेको दृष्य अहिले सेतोपुल देखि एक टोली र अनामनगर देखि माथि एक टोली देख्न सकिन्छ । गत चैत १८ गते देखि धोबीखोला अथवा रुद्रमती र वागमती नदी दोभानबाट रुद्रमतीको शिरतर्फ सफाइ सुरु भएको थियो । श्रम बैङ्कबाट लिइएको ५५ जना जनशक्तिलाई ४ समूह बनाएर नदीभित्रको सफाइ थालिएको हो । 

सफाइ हरेक दिन बिहान ७ बजेदेखि अपरान्ह २ बजेसम्म हुनेछ । पहिलो चरण अन्तर्गत खोलाको फोहोर उठाएर छेउ मा जम्मा गर्दै आएको छ । फोहोर पूर्ण रुपमा जम्मा गरिसकेपछि डोजर लगाएर फोहोर झिकिने छ । 

काठमाडौँमा मुख्य ९ वटा नदी छन् । सफाइका क्रममा सबैभन्दा धेरै पाइने फोहोर प्लाष्टिक रहेको छ । यसपछि कपडा छन् । घाट क्षेत्रमा काठ, दाउरा, कोइला, कपडादेखि अन्य विभिन्न प्रकारका फोहोर भेटिने गरेको छ । यी मध्ये बागमती नदीको पहिलेदेखि सफाइ  भइरहेकाले महानगरपालिकाले यो नदी सफाइ गर्ने योजना बनाएको छैन । यसबाहेकका ८ वटा नदीको सफाइलाई नियमित सञ्चालन गरिनेछ ।