निर्वाचन प्रणाली खराब भयो, कांग्रेस र एमाले मिलेर संविधान संशोधन गरौँः शेखर कोइराला

२८ चैत, काठमाडौं । नेपाली कांग्रेसका  वरिष्ठ नेता डा. शेखर कोइरालाले अहिलेको समस्याको जड निर्वाचन प्रणाली भएको बताएका छन् । लुम्बिनीमा आयोजित नेपाल शिक्षक संघको कार्यक्रमलाई बुधबार सम्बोधन गर्दै कोइरालाले संविधान संशोधन गरेर निर्वाचन प्रणालीलाई सुधार गर्नुपर्ने बताएका हुन् ।

कोइरालाले अहिलेको समस्याको जड निर्वाचन प्रणाली भएको र निर्वाचन प्रणालीकै कारण सरकार गठन र विघटन भइरहेको उनको भनाइ छ । नेता कोइरालाले संविधान संशोधन नगरेसम्म देशमा राजनीतिक स्थिरता कायम नहुने बताए । त्यसका लागि कांग्रेस र एमाले मिल्नुको विकल्प नभएको उनको भनाइ छ ।

उनले संविधान संशोधनमार्फत सुशासन, विकास र समृद्धिको बाटोमा हिँडाउन कांग्रेस र एमाले मिलेर अगाडि बढ्नुपर्ने आवश्यकता रहेको बताए । कति सधैँ सरकार गठन र विघटनमा मात्रै लागिरहने ? जनताका काम कहिले गर्ने ? विकास कहिले गर्ने ?,उनले भने ।  

नेता कोइरालाले संविधानसभाको पहिलो निर्वाचनबाट कम्युनिस्टहरू पटक–पटक सत्तामा पुगे पनि संविधान बनाउन नसकेको र दोस्रो संविधानसभाबाट कांग्रेसको नेतृत्वमा सरकार बनेपछि मात्र संविधान बनेको स्मरण गरे । परिवर्तन कांग्रेसबाट मात्रै सम्भव छ भन्ने कुरा बुझ्नपर्याे  । त्यसैले अब कांग्रेस र एमाले मिलेर संविधान संशोधन गर्नुपर्ने आवश्यकता छ । 

कोइरालाले राजनीतिक स्थिरता, सुशासन र विकास आफ्नो मूल एजेन्डा भएको र त्यसमा आफू पूर्णरूपले प्रतिबद्ध रहेको पनि बताए । उनले गौतम बुद्धको पवित्र भूमि लुम्बिनीबाट आजैदेखि सबैले सत्यको बाटोमा हिँड्ने प्रण गर्दै देश बनाउने अभियानमा लाग्ने अठोट गर्न सबैलाई आग्रह गरे । उनले भने, ‘गलत निर्वाचन प्रणालीको परिणामले जहिल्यै सरकार गठन र बिघटन हुने अवस्था आएको छ । त्यसैले संविधान संशोधन नगरेसम्म देशमा राजनीतिक स्थिरता कायम हुँदैन ।’

संविधान संशोधन गरेर सुशासन, विकास र समृद्धिको बाटोमा मुलुकलाई हिंडाउन कांग्रेस र एमाले मिलेर अगाडि बढ्नुपर्ने आवश्यकता रहेको कोइरालाले बताए । अब निर्णायक शक्ति मिलौं, कति सधैं सरकार गठन र बिघटनमा मात्रै लागिरहने, जनताका काम कहिले गर्ने, विकास कहिले गर्ने,’ उनले भने ।