विश्वमा सबैभन्दा बढी साइबर अपराध हुने सूचीमा रुस

३० चैत, काठमाडाैं । रुसमा विश्वमै सबैभन्दा बढी साइबर अपराध हुने गरेको नयाँ अनुसन्धानले खुलासा गरेको छ । विज्ञहरुले सार्वजनिक गरेको ‘वर्ल्ड साइबर क्राइम इन्डेक्स’ अनुसार रुस सबैभन्दा अगाडी रहेको हो । त्यस्तै यस सूचीमा युक्रेन दोस्रो स्थानमा छ भने चीन तेस्रो स्थानमा छ ।

यस सूचीमा अमेरिका चौथो स्थानमा छ भने नाइजेरिया पाँचौं, रोमानिया छैटौं, उतर कोरिया सातौं, बेलायत आठौँ ब्राजिल नवौं र भारत दशौँ स्थानमा रहेका छन् ।

प्रतिवेदनमा र्यान्समवेयर, क्रेडिट कार्ड चोरी र जालसाजीलगायत साइबर अपराधका विभिन्न वर्गका आधारमा मुख्य हटस्पटहरू पहिचान गरिएको थियो । साइबर अपराध मामिलाहरु को आधार मा दिइएको स्कोर ‘विश्व साइबर क्राइम इन्डेक्स’ मा साइबर अपराधका घटनाका आधारमा अङ्क दिइएको छ । तर, केसको संख्या भने उल्लेख गरिएको छैन । रुसको विश्व साइबर क्राइम इन्डेक्स स्कोर १०० मध्ये ५८.३९, युक्रेनको ३६.४४ र चीनको २७.८६ थियो ।

अक्सफोर्ड युनिभर्सिटी र युनिभर्सिटी अफ न्यु साउथ वेल्सका विज्ञहरूले साइबर अपराधबारे विश्वव्यापी अध्ययन गरेका थिए । यसका आधारमा सूचकांक तयार गरिएको हो ।

उक्त अध्ययनले साइबर अपराधका मुख्य पाँच वर्गमा केन्द्रित थियो । यी विज्ञहरूले प्रत्येक साइबर अपराध श्रेणीको प्राथमिक स्रोत मानिने देशहरू पहिचान गरे। यसबाहेक, तिनीहरूले साइबर अपराध गतिविधिको प्रभावको आधारमा प्रत्येक देशलाई वर्गीकरण गरे ।