पक्राउ परेका नेतालाई तत्काल रिहा गर्न राष्ट्रिय एकता अभियानको माग

१ वैशाख, जनकपुरधाम । राष्ट्रिय एकता अभियानले पक्राउ परेका आफ्ना नेता रिहाइको माग गरेको छ । अभियानले जानकी मन्दिरबाट आफ्ना नेताहरू मनिष पूर्वे र ज्ञानेन्द्र झाको पक्राउको विरोधमा विज्ञप्ति जारी गर्दै तत्काल रिहा गर्न माग गरेको हो । 

अभियान महासचिव डा. प्रभात कुशवाहले विज्ञप्ति जारी गर्दै आफ्ना नेताहरूको पक्राउलाई असंवैधानिक र अलोकतान्त्रिक कुकृत्यको संज्ञा दिँदै घोर भर्त्सना गरेका छन् । 

जानकी मन्दिर परिसरबाट केही युवा युवतीहरू अश्लील कृयाकलाप गरिरहेकाे देखेर विरोध गर्दा दुबै हिन्दु अभियानीहरुलाई जिल्ला प्रहरी धनुषाले पक्राउ गरेको बुझिएको छ। 

विज्ञप्तिमा भनिएको छ, 'संघीय लोकतान्त्रिक हिन्दू गणतन्त्रको स्थापनाको लागि प्रतिबद्ध अभियानका कार्यकर्ताहरूलाई पटक पटक पक्राउ गर्ने, सरकारी संयन्त्रमार्फत धम्क्याउने, अभियानका शान्तिपूर्ण प्रदर्शनमा हस्तक्षेप गर्ने कार्यले सरकारी संयन्त्र नै संघीयता र लोकतन्त्र समाप्त गरि नेपालमा एकात्मक राजतन्त्र फर्काउन लागेको ठहर हुन्छ। तर हजारौं नागरिकको बलिदान पश्चात् मुलुकले पाएको संघीय लोकतान्त्रिक गणतान्त्रिक व्यवस्थालाई अक्षुण्ण राख्न हामी संघर्षरत गर्ने छौ।'

अभियानले जानकी मन्दिरको गरिमामाथि आच पुर्याउने असामाजिक तत्वहरूलाई तुरुन्तै पक्राउ गरि हिन्दु अभियानीहरू मनिष पूर्वे र ज्ञानेन्द्र झालाई तत्काल रिहा गर्न माग समेत गर्दै त्यसो नगरिएको खण्डमा अभियान आन्दोलनका कडा कार्यक्रमहरू संचालन गर्न बाध्य हुने बारेमा  सम्बन्धित निकायको ध्यानाकर्षण गराएको छ।