एमालेले नमाने कांग्रेसले सुदूरपश्चिममा सोडारीलाई सघाउने

६ वैशाख, काठमाडौं । नेपाली कांग्रेसले आवश्यक परे सुदूरपश्चिमको मुख्यमन्त्रीमा नेकपा एकीकृत समाजवादीका उम्मेदवार दीर्घ सोडारीलाई सघाउने भएको छ । सोडारीको विषयमा नेकपा एमालेले साथ नदिने अवस्था आएपछि समाजवादीका अध्यक्ष माधवकुमार नेपालले कांग्रेस सभापति शेरबहादुर देउवालाई भेटेर सहयोग गर्न आग्रह गरेका थिए । 

सभापति देउवाले कांग्रेसले सोडारीलाई आवश्यक परे सहयोग गर्ने बचन दिएको कांग्रेसका एक नेताले नेपालबहसलाई जानकारी दिए । सभापति देउवा र एकीकृत समाजवादीका अध्यक्ष नेपालबीच भएको भेटवार्तामा यस्तो सहमति भएको हो । 

नेपाली कांग्रेसका नेता डा. नारायण खड्काको निवासमा देउवा र नेपाल बीच बुधबार बेलुका भेटवार्ता भएको हो । साँझ ६ बजेदेखि करिब डेढ घण्टा दुई नेता बीच संवाद भएको जानकारी गराएको छ । छलफल मुख्य गरी सुदूरपश्चिम सरकारका बारेमा केन्द्रित थियो ।

सत्ता गठबन्धनमा सुदुरपश्चिममा एकीकृत समाजवादीबाट मुख्यमन्त्री बनाउने निर्णय भएको छ । एकीकृत समाजवादीले प्रदेशका संसदीय दलका नेता सोडारीलाई मुख्यमन्त्री बनाउने निर्णय गरेको छ । सोडारीको पक्षमा भने एमाले देखिएको छैन । मुख्यमन्त्रीमा दाबी पेश गर्न प्रदेश प्रमुखले दिएको समय आज सकिँदैछ ।