विश्वासको मत नपुग्ने भएपछि गण्डकीका मुख्यमन्त्रीलाई सुरुमै संकट, औचित्यहीन बन्यो विशेष अधिवेशन

७ वैशाख, काठमाडौं । सभामुखको मत जोडेर मुख्यमन्त्रीका लागि दावी पेश गर्ने मत पुर्याएका गण्डकी प्रदेशका मुख्यमन्त्री खगराज अधिकारी संकटमा परेका छन् । सर्वोच्च अदालतको आदेश विपरीत आज शुक्रबार विश्वासको मत दिने भन्दै  विश्वासको मत लिने भन्दै विशेष अधिवेशन बोलाएका थिए । तर, उनलाई आवश्य मत प्राप्त नहुने भएको छ । 

सर्वोच्चको आदेश नमानेको भन्दै विपक्षी कांग्रेस र राप्रपाले अधिवेशन वहिस्कार गर्ने भनेका छन् । आज बोलाइएको अधिवेशन औचित्यहीन हुन देखिएको छ । उनलाई संसदबाट आफ्नो पक्षमा बहुमत नपुग्ने देखिएको छ । प्रदेश सभाको विशेष अधिवेशन आज दिउँसो ३ बजेदेखि सुरु हुनेछ ।  

संसद सचिवालयका अनुसार केही विधेयक छलफलका लागि तयार छ । अन्य बिजनेस भने संसदमा छैन । संसद सचिवालयका सूचना अधिकारी प्रेम सुवेदीका अनुसार अहिलेसम्म विश्वासको मत लिनेबारे जानकारी संसद सचिवालयमा छैन । उनले १ बजे कार्यव्यवस्था परामर्श समितिको बैठक बसेर कार्यसूची तय गर्ने जानकारी दिएका छन् । 

मंगलबार बसेको मन्त्रिपरिषद् बैठकले वैशाख ७ गते विशेष अधिवेशन डाक्न प्रदेश प्रमुखलाई सिफारिस गरेको थियो । सोही सिफारिसका आधारमा आज दिउँसो ३ बजेदेखि प्रदेश सभा भवन नदीपुरमा बस्ने गरी प्रदेश प्रमुख डिलाराज भट्टले विशेष अधिवेशन डाकेका हुन् ।

सर्वोच्च अदालतले दीर्घकालीन निर्णय गर्न रोक लगाए पनि संसद बैठक डोकेको भन्दै प्रमुख प्रतिपक्षी दल नेपाली कांग्रेस र राप्रपाले भने बैठक बहिष्कार गर्ने भएको छ । आफूविरुद्धको मुद्दामा सर्वोच्च अदालतमा सुनुवाइ हुनुअघि नै विश्वासको मत लिने तयारीमा मुख्यमन्त्री अधिकारी लागेका थिए । सभामुखलाई समेत गणना गरेर मुख्यमन्त्रीमा दाबी गरेको र सोही दाबीका आधारमा मुख्यमन्त्री नियुक्त गरेको भन्दै नेपाली कांग्रेस २७ चैतमा सर्वोच्च पुगेको थियो ।

सोही रिटउपर सर्वोच्च अदालतले सर्वोच्चले २८ चैतमा मुख्यमन्त्री खगराज अधिकारी नेतृत्वको गण्डकी प्रदेश सरकारलाई दीर्घकालीन असर पर्ने निर्णयहरू नगर्न अन्तरिम आदेश दिएको थियो । कांग्रेस संसदीय दलका नेता सुरेन्द्रराज पाण्डेले सर्वोच्चमा दायर गरेको रिटमा १० वैशाखमा पेशी तोकिएको छ ।