आईजीपी कुँवरले जीबी राई र जीवन चलाउनेसहित २० जना फरार अभियुक्तबारे इन्टरपोलमा कुरा राख्ने

१० बैशाख, काठमाडौं । प्रहरी महानिरीक्षक वसन्तबहादुर कुँवरले झण्डै ६१ केजी सुन तस्करी र सहकारी ठगी प्रकरणमा जोडिएका २० भन्दा बढी फरार अभियुक्त बारेमा इन्टरपोलमा कुरा राख्ने भएका छन् । सहकारी ठगी प्रकरणमा मात्रै नेपाल प्रहरीले १८ जनाभन्दा बढी फरार अधियुक्तको खोजी गर्न इन्टरपोलमार्फत रेडकर्नर नोटिसा जारी गरेको छ । 

प्रहरी महानिरीक्षक कुँवरले फ्रान्सको लियोनमा हुने इन्टरपोलको सम्मेलनमा भाग लिने क्रममा यास विषयमा कुरा उठाउने भएका हुन् । इन्टरपोल महासचिवालयले वैशाख ११ गतेदेखि १३ गतेसम्म लियोनमा १९औं इन्टरपोल सम्मेलन आयोजना गरेको छ । त्यसमा इन्टरपोल सदस्य राष्ट्रका प्रहरी प्रमुखहरु सहभागी हुनेछन् ।

महानिरीक्षक कुँवर फ्रान्स प्रस्थान गरिसकेको प्रहरीले जनाएको छ । उच्च प्रहरी स्रोतका अनुसार नेपाल प्रहरीले पोखराको सूर्यदर्शन सहकारीका पदाधिकारी गीतेन्द्र (जीबी) राई, महेन्द्र भोटे भनिने शिवबहादुर गुरुङसहित १८ जनाविरुद्ध इन्टरपोलबाट रेड कर्नर नोटिस जारी गरेका छ ।

सहकारीका बचतकर्ताले आफूहरुको करिब सवा अर्ब रकम हिनामिना गरेको भन्दै ठगीमा उजुरी दिएपछि फरार जीबी, महेन्द्रलगायतलाई पक्राउ गर्न अन्तर्राष्ट्रिय प्रहरी अपराध संगठन (इन्टरपोल) बाट रेडकर्नर नोटिस जारी भएको हो । 

यस्तै झण्डै ६० किलो सुनमा जोडिएका जीवन चलाउनेविरुद्ध पनि अन्तर्राष्ट्रिय प्रहरी संगठन ‘इन्टरपोल’ बाट डिफ्युजन जारी गरिएको छ । सुन तस्करी मुद्दामा उनी फरार अभियुक्त हुन् । अछामको तुर्माखात गाउँपालिका घर भएका चलाउने विरुद्ध इन्टरपोलबाट डिफ्युजन नोटिस जारी भएको एक साता वितेको छ ।

चलाउने तिब्बतीयन मुलका बेल्जियन नागरिक दावा छिरिङसँग निकट मानिन्छन् । दावासँग ‘कनेक्सन’ देखिएपछि जीवन चलाउनेलाई प्रहरीले महाराजगन्जस्थित केन्द्रीय अनुसन्धान ब्युरोको कार्यालयमा अनुसन्धानको लागि बोलाएको थियो । तर, ब्युरोका अधिकारीहरूले ‘बयान कागज’ गराएर उनलाई रिहा गरिदिए पनि फरार छन् ।