वालिङमा छोरी जन्माउनेलाई निःशुल्क स्वास्थ्य बीमा

मणि प्रसाद अर्याल

१४ वालिङ, काठमाडौं । स्याङ्जाको वालिङ नगरपालिकाले छोरी जन्माउनेलाई गर्दै आएको निःशुल्क स्वास्थ्य बीमा प्रभावकारी बनेको छ । नगरपालिकाले यो आर्थिक वर्षदेखि छोरी जन्माउनेलाई निःशुल्क स्वास्थ्य बीमाको सुरु गरेको हो । 

छोरीहरूलाई समाजले दोस्रो दर्जाकारुपमा हेर्ने गरेको अवस्थामा नगरपालिकाले उक्त कार्यक्रम लागु गरेको नगर प्रमुख कृष्ण खाँणले बताए । छोरीहरूलाई  प्रोत्साहन गर्नुपर्ने नगर प्रमुख खाँणले उल्लेख गरे । आधा हिस्सा ओगटेका नारीहरूको सम्मानका साथै उनीहरुको मनोबल उच्च राख्न आवश्यक छ । जहाँ नारीको सम्मान हुन्छ, त्यो समाज सुसंस्कृत र समुन्नत हुने उनले औंल्याए । 

उनले भने, “घर र समाजमा नारीहरूको महत्वपूर्ण भूमिका रहँदा रहँदै पनि समान रुपमा सम्मान दिन सकिएको छैन ।” यसमा टेवा पुगोस भन्ने नगरपालिकाको उद्देश्य रहेको नगर प्रमुख खाँणले बताए । यसैगरी नगर उपप्रमुख कविता तिवारी गैह्रेले निःशुल्क स्वास्थ्य बीमा कार्यक्रमले नारी उत्थानमा भूमिका खेल्ने बताइन् । उनले नगरवासी आमा दिदी बहिनीले यो कार्यक्रममा सहभागी भई लाभ लिन आग्रह गरिन् । 

नागरिकको स्वास्थ्य ठूलो कुरा भएको उल्लेख गर्दै नगर उप प्रमुख तिवारीले नारी सम्मानसँगै निःशुल्क स्वास्थ्य बीमा कार्यक्रम लागु गरिएको बताइन् । वालिङ नगरपालिकाले यो आर्थिक वर्षमा मात्र करिब ३०० जना नागरिकको निःशुल्क स्वास्थ्य बीमा गरेको नगरपालिकाले जानकारी दिएको छ ।