यो वर्ष आर्थिक वृद्धिदर ३.८७ प्रतिशत, अर्थतन्त्रको आकार ५७ खर्ब

१८ वैशाख, काठमाडौं । राष्ट्रिय तथ्यांक कार्यालयले यस वर्षको आर्थिक वृद्धिदरको ३.८७ प्रतिशत हुने जनाएको छ । मंगलबार यस वर्षको ८ महिनाको वास्तविक तथ्यांक र बाँकी अवधिको अनुमानका आधारमा आर्थिक वृद्धिदर सार्वजनिक गर्दै कार्यालयका प्रमुख तथ्यांक अधिकारी अर्जुनप्रसाद पोखरेलले यो तथ्यांकले अर्थतन्त्रका सूचकांक सकारात्मक रहेको बताए । 

नेपालको अर्थतन्त्रको आकार ५७ खर्ब ५ अर्ब पुगेको उनले बताए । कार्यालयले वार्षिक राष्ट्रिय लेखा अनुमानमा उक्त तथ्यांक देखाएको हो । सरकारले चालु आवमा ६ प्रतिशतको आर्थिक वृद्धिदर उपभोक्ता मूल्यमा ३.८७ प्रतिशतको वृद्धिदर भएपनि आधारभूत मूल्यमा भने ३.५४ प्रतिशत रहेको कार्यालयले जनाएको छ । 

अर्थतन्त्रमा देखिएको शिथिलताले गत आवमा १.९५ प्रतिशतको मात्रै आर्थिक वृद्धिदर हासिल भएकोमा चालु आवमा केही सुधार भएपनि लक्ष्यभन्दा धेरै न्यून हो । कृषि क्षेत्रको आर्थिक वृद्धिदर ३.०५ प्रतिशत र गैरकृषि क्षेत्रको वृद्धिदर ३.७५ प्रतिशत हुने अनुमान कार्यालयले सार्वजनिक गरेको छ । चालु आवमा कुल मूल्य अभिवृद्धि वृद्धिदर प्राथमिक क्षेत्रको ३ प्रतिशत द्वितीय क्षेत्रको १.२ प्रतिशत र सेवा क्षेत्रको ४.५ प्रतिशत रहेको केन्द्रीय तथ्यांक कार्यालयले जनाएको छ ।  चालु आर्थिक वर्षको अन्त्यसम्म जीडीपीको २२.९६ प्रतिशत रेमिट्यान्स भित्रिने अनुमान गरिएको छ । गत वर्ष रेमिट्यान्स जीडीपीको २२.८२ प्रतिशत थियो ।