डिजिटल हुण्डीमा १० करोडमाथि कारोबार गर्नेलाई गुपचुपमा अदालत

२० वैशाख, काठमाडौं । नेपालमा करोडौं रुपैया बराबरको डिजिटल हुण्डी गर्ने एक जनाको मुद्दा गुपचुपमा अदालत पुगेको छ । करोडौंको हुन्डी कारोबार गरेको आरोपमा प्रहरीले काठमाडौंका एक युवकलाई पक्राउ गरी अदालतमा मुद्दा दायर गरेको हो । धनुषा घर भई काठमाडौं बस्ने २४ वर्षीय पियुष खेतानविरुद्ध क्रिप्टोकरेन्सी र हुन्डी कारोबारको आरोपमा मंगलबार जिल्ला अदालत काठमाडौंमा मुद्दा दायर भएका भएपनि उनको पक्राउ र अनुसन्धानबारे प्रहरीले केही जानकारी दिएको थिएन ।

प्रहरी स्रोतका अनुसार बाइनान्स र ओके एक्स एपमार्फत १० करोड ४० लाख ७८ हजार रुपैयाँ बराबरको हुन्डी कारोबार गरेको देखिएपछि उनलाई पक्राउ गरिएको थियो । प्रहरीलाई बयान दिने क्रममा पनि खेतानले एप मार्फत कारोबार गरेको स्वीकार गरेका छन् ।  प्रहरी स्रोतले दिएको जानकारी अनुसार अध्ययनका लागि भारत जाँदा चिनजान भएका बिक्की महतोसँग मिलेर आफूले हुण्डी–क्रिप्टो कारोबार गरेको उनले बयान दिएका हुन ।

खेतानको कालीमाटीमा कपडा पसल छ । सोही पसलको आवरणमा उनले हुन्डी धन्दा चलाउँदै आएको प्रहरीको दावी छ । प्रहरीले विक्कीको बारेमा पनि भारतीय प्रहरीलाई जानकारी गराएको छ । अन्तर्राष्ट्रिय कारोबार मिलाउन अवैध रूपमा क्रिप्टो कारोबारसमेत गर्दै आएका थिए । यो डिजिटल हुन्डी भएको र पछिल्लो समय फस्टाउँदै गएको बेला खेतान पक्राउ परेका हुन् । प्रहरीले खेतानको कारोबारमाथि विस्तृत अनुसन्धान नगर्दा अन्य कारोबारी भने पक्राउ परेका छैनन् ।