कांग्रेसको माग र सदन सुचारु गर्ने विषयमा सभामुख र शीर्ष नेताबीच आज छलफल

२५ वैशाख, काठमाडौं । नेपाली कांग्रेसले सहकारी ठगीका विषयमा छानबिन गर्न उच्चस्तरीय संसदीय छानबिन समिति गठन नभएसम्म संसद अवरोध गर्ने जानकारी दिएपछि सभामुख देवराज घिमिरेले यसबारे छलफल गर्न प्रमुख दलका शीर्ष नेताहरूको बैठक बोलाएका छन् । 

सभामुखको कार्यकक्षमा आज बिहान साढे ११ बजे प्रधानमन्त्रीसहित शीर्ष नेताहरूको बैठक बोलाइएको उनको सचिवालयले जानकारी दिएको छ ।

सचिवालयले दिएको जानकारी अनुसार आजको छलफलका लागि सभामुख घिमिरेले प्रधानमन्त्री पुष्पकमल दाहाल, नेपाली कांग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओली, राष्ट्रिय स्वतन्त्र पार्टीका सभापति रवि लामिछाने र राष्ट्रिय प्रजातन्त्र पार्टीका अध्यक्ष राजेन्द्र लिङ्देनलाई बैठकमा बोलाइएका छन् । 

यही वैशाख २८ गतेदेखि सुरु हुने बर्खे अधिवेशन सहज रुपमा सन्चालनको वातावरण बनाउने प्रयासमा शीर्ष नेताहरूलाई बैठकमा बोलाइएको सभामुख घिमिरेका प्रेस सल्लाहकार शेखर अधिकारीले जानकारी दिए ।

सहकारी संस्थाको रकम हिनामिना प्रकरणमा मुछिएका रास्वपा सभापति समेत रहेका उपप्रधान एवं गृहमन्त्री रवि लामिछाने उपर छानबिन गर्न संसदीय समितिको अडान राख्दै प्रमुख प्रतिपक्षी दल नेपाली कांग्रेसले अघिल्लो अधिवेशनको अन्त्यतिर निरन्तर बैठक अवरोध गरेको थियो । 

सरकारले संसदीय छानविन समिति नबनाए २८ गते देखिको बैठक चल्न नदिने कांग्रेसको अडान छ । बजेट अधिवेशनका रुपमा बोलाइएको सदन अवरोध हुँदा सदनको कारवाही प्रभावित हुने भन्दै सभामुखले शीर्ष नेताहरूको बैठक बोलाएका हुन् ।

सहकारी प्रकरणबारे सदनमा उठेका विषयलाई सहमतिमा टुंग्याउन सभामुखले प्रमुख सचेतक, सचेतक र कार्य व्यवस्था समितिमा अलग–अलग छलफल गरेका थिए । व्यक्ति तोकेर नभई संकटमा रहेका सहकारी संस्थाहरूको समग्र समस्या समाधान गर्ने गरी संसदीय समिति बनाउने प्रयासमा सत्ता गठबन्धनका दलहरू छन् । तर नेपाली कांग्रेसले रवि लामिछानेलाई बाहिर राख्ने गरी छानबिन समिति बन्न नसक्ने बताएको छ ।