गण्डकी प्रदेश सरकारविरुद्धको रिटमा आज सुनुवाइ नहुने

२७ वैशाख, काठमाडौं । गण्डकी प्रदेश सरकारविरुद्धको रिटमा आज सुनुवाइ नहुने भएको छ । बिहीबार सर्वोच्च अदालतका सबै सुनुवाइ स्थगित भएका कारण सुनुवाइ नहुने भएको हो । पूर्वन्यायाधीश हरिजंग सिजापतिको निधन भएकाले सर्वोच्च अदालतमा तोकिएका सबै पेशीको सुनुवाइ स्थगित भएको हो । 
 
पेशी तोकेर सुनुवाइमा चढिसकेका सबै मुद्दा आज स्थगित भएको सर्वोच्च प्रशासनले जनाएको छ । आज गण्डकी प्रदेश र सुदूरपश्चिम प्रदेश सरकारसम्बन्धी विवादको सुनुवाइ हुने तय भएपनि योसहित सबै स्थगित हुने भएको छ । प्रशासनीक कार्यहरु भने निरन्तर हुने सर्वोच्चले जनाएको छ ।

 प्रदेश सरकारले पाएको विश्वासको मतको विषयलाई लिएर नेपाली कांग्रेस गण्डकी प्रदेशले मंगलबार सर्वोच्च अदालतमा दायर रिट न्यायाधीश मनोजकुमार शर्माको इजलासमा परेको थियो ।  

संसदीय दलका नेता सुरेन्द्र पाण्डेले सर्वोच्चको आदेश देखाउँदै गण्डकी प्रदेशका मुख्यमन्त्री खगराज अधिकारीले ६० मा ३० मतलाई बहुमत भन्दै विश्वासको मत पाएको सभामुख कृष्णप्रसाद धितालले घोषणा गरेपछि सर्वाेच्चमा रिट हालेका थिए । रिटमा संविधान र गणितको अन्तर्राष्ट्रिय नियम नै बदल्ने गरी सभामुखद्वारा गरिएको घोषणा बदर गरी आफूलाई संविधानको धारा १६८ (३)को मुख्यमन्त्री नियुक्तिको आदेश दिन माग गरिएको छ ।