दलहरुबीच सहमति नभई सभामुखले सुरु गरे संसद बैठक

२८ वैशाख, काठमाडौं । सभामुख देवराज घिमिरेले कांग्रेसको मागमा सत्तापक्ष असहमत भएपछि सहमतिबिनै संसद् बैठक सुरु गरेका छन् । सभामुखले प्रमुख सचेतकहरूसँग राखेको बैठकमा सत्तापक्षले सहमति नदिएपछि बैठक बिनानिष्कर्ष टुंगिएको थियो । 
प्रमुख सचेतकहरूले आआफ्ना शीर्ष नेतासँग छलफल गरेपछि शीर्ष नेताहरूले संसदीय समितिमा सहमति नगर्ने बताएपछि सभामुखले बिनासहमति बैठक सुरु गरेका हुन् ।

आजको बैठकमा शीर्ष नेताहरुलाई बोल्न दिने कार्यसूचीमा नेपाली कांग्रेसले असहमति जनाएपछि कार्यव्यवस्था परामर्श समितिको बैठक अझै सुरू हुन सकेको छैन । संघीय संसद् सचिवालयका एक पदाधिकारीका अनुसार मध्याह्न साढे १२ बजेका लागि बोलाइएको कार्यव्यवस्था परामर्श समिति बैठक सुरु हुन नसकेको हो ।

सभामुख देवराज घिमिरे दलका प्रमुख सचेतकहरूसँग छलफलमा कांग्रेसले कार्यसूचीमाबारे असहमति राखेपछि सहमति नभएको हो । सचेतकहरूसँगको छलफलमा सहकारीको बचत अपचलनमा गृहमन्त्री रवि लामिछानेको संलग्नता छानबिनका लागि संसदीय समिति बनाउने विषयमा सत्ता पक्ष तयार नभएपछि कार्यव्यवस्था परामर्श समितिको बैठक नै बस्न नसकेको हो ।

आज बस्ने तय भएको संसद बैठकका कार्यसूची तय गर्नुअघि सभामुख देवराज घिमिरेले दुई चरणमा प्रमुख सचेतक र सचेतकहरुसँग छलफल गरेका थिए । सो छलफलमा कांग्रेस नेताहरुले राष्ट्रपतिको कार्यालयबाट प्राप्त पत्रमात्रै वाचन गर्न दिने, आफ्ना कुरा राख्ने तर शीर्ष नेताहरुलाई बोल्ने कार्यक्रम र नियमित कार्यसूचीमा प्रवेश गर्न नदिने बताएका थिए ।