अब सर्वोच्चमा पनि अनलाइनबाटै रिट दर्ता गर्न मिल्ने

१ जेठ, काठमाडौं । सर्वोच्च अदालतले अनलाइनबाटै रिट निवेदन दर्ता गर्न पाउने व्यवस्था मिलाएको छ । यसले अदालतमै गएर निवेदन दर्ता गर्नुपर्ने यसअघिको व्यवस्था परिमार्जन भएको छ । अब सर्वोच्चले अनलाइन माध्यमबाटै पनि निवेदन दर्ता गर्ने सुविधा दिएको छ । मंगलबार प्रधानन्यायाधीश विश्वम्भर श्रेष्ठले यो सेवा सुरु गरेका हुन् । 

सर्वोच्च अदालतका रजिष्टार विमल पौडेलका अनुसार मंगलबार दुई सफ्टवेयर मार्फत अनलाइनबाट रिट दर्ता सुरु भएको हो । अनलाइनबाट रिट दर्ता भएकाहरुको पछि अरु कागजात मागिने छ । अनलाइनबाट पठाएको रिट निवेदन हेर्ने र त्यसलाई अघि बढाउन उपयुक्त देखिएमा अरु कागजात मागिनेछ ।